Bah RM Shabong
U Donald Trump, u don mynta 78 snem ka rta bad u dang shu shimti shen (ha ka sien kaba ar) kum U President ba thymmai jong ka Ri America bad U Trump, ula jop ïa kane ka elekshon, kaba dei, katba kum ki kyndon jong ka synshar paidbah, kaba don ha ka Ri America.
Hynrei, kaba ngi dei ban ïakren hangne, ka long ba kumno sha U Trump, mar ïa jop elekshon, u sngewieid bad sngewjan ïa U Vladimir Putin, U President jong ka Russia, uba la hiar thma bad kurup bein ïa ki jaka ki puta jong ka Ukraine. Ym tang katta, la ïohi, ba ula ïakren mardor ïa U Putin, ban pynkut noh ïa ka thma hapdeng ka Russia bad Ukraine bad ula beh ksew ruh ïa U President jong ka Ukraine, U Volodomyr Zelensky, haba u Zelensky, ula leit ban ïakynduh bad ïakren ïa U Trump, na bynta ka jingkyrshan jong ka America, ïa katei ka ri, ha ka jingïaleh jongka bad ka Russia, kumba la kyrshan da U Joe Biden, President barim jong katei ka Ri. Ym tang katta, la ïohi, ba U Trump, ula phah ruh ïa ki heh ki hain jong ka sorkar America, ban ïakren bad U Putin, na ka bynta ban poi noh sha ka jingpynkut ïa ka thma jong kitei ki ar tylli ki ri.
Ym tang ïa U Putin, hynrei U Trump, u ieid ruh ïa U Kim Jong Un, uba dei u nongsynshar thombor jong ka North Korea, da kaba u ong “I likes him and he likes me (Nga sngewieid ïa u bad u ruh, u sngew ieid ïa nga) bad kam dei tang katta, la ïohi ba U Trump, u don ruh ka jingsngewjan ïa U President ka China, U Xi Jingpin.
Hangne, u mih u dak jingkylli, ba U President jong ka ri synshar paidbah, uba la jop da ka elekshon kaba la pynïaid da kaba khuid ba suba, ha kaba ïalade ula shah siat na shkor, katba u dang ïaid kanbas kylleng kylleng ha u snem ba ladep, hynrei kumno u pdiang ïa ki laingut ki nongsynshar thombor jong ka pyrthei, lada dei ïa U Xi, u nongsynshar jong ka ri kaba pynïaid da kawei ka seng lane ka seng Communist ka China, nangta U Putin, uba la synshar ïa ka Russia, naduh u snem 2012 bad uba la set phatok bad pynïap ïa ki riew ïaleh pyrshah jongu bad mynta ula pynkylla ïa ka riti synshar ri, ba un dang ïai bteng ban synshar ïa katei ka ri, haduh u snem 2036. Nangta sa ïa U Jong Un, uba synshar ïa ka ri, da ki kam thombor bad ba katei ka dei ka ri kaba duk ksew bad ha kaba u pynïap ïa kito kiba ïaleh pyrshah ïa u bad nangta ba u synshar donbor marwei, haduh ba un da ïap, kumba ula leh u kpa bad u kpaieid jong u bad kaba lyngngoh, ka long ba U Trump, u kyntait ruh ban ïatreilang bad ki paralok, kiba ju don synrap bad ka US, lada dei ka United Kingdom, ka France, ka Germany bad wat ki ri, kiba don ha ka thup jong ka North Atlantic Treaty Organisation (NATO).
Ka America, ka dei ka ri synshar paidbah bad U Trump, un don ha ka bor synshar jongu, tang saw snem kynthih bad un nym lah ban shim tam ïa katei ka por, ba la buh bad nangta sa ïa ki kam ki jongu, ki don ki liang pyrshah lem bad u paidlang jong katei ka ri uba peitngor, ha man la ki rai kiba kongsan kiba u pyntreikam ha la ka jong ka Ri ne wat ïa kiba ïadei bad kiwei pat ki ri ruh kumjuh.
Ka mat kaba kongsan, ka long ba U Trump, u sngewieid ïa kitei ki nongsynshar thombor, ka lah ban long lehse, ba u ïohi, ba ki jingtreikam jongki, ki suk kynjai bad ba katba ki rai, kam don kano kano ka jingpyrshah lane ba u paidlang jong kitei ki ri, u pdiang hun mynsiem beit bad lada dei ban bam da u phlang ruh kam pher (kumba long ïa ki nongshong shnong ha North Korea), hynrei ha kajuh ka por, u dei ban sngewthuh ba lada u ïadei kam bad kitei ki nongsynshar thombor, kumta ka kam kan nym poi satia sha kaba bha lano lano ruh bad ïa katei ngi dei ban kynmaw, ba dalade hi U Trump, ula leit iuhkjat sha North Korea, ha ka por, ba u long President mynshwa, hynrei katei ka jingleit ka shu kut ha ka jingïakren thohmut thohmat bad mynta ruh, ngi ïohi haba U Trump, ula pynkhreh ban ïakren ïa ka jingpynkut ïa ka thma ha Ukraine, ba U Putin jong ka Russia, u dawa ban sangeh noh mardor ïa ka jingai tiar thma jong ka US sha Ukraine bad katei ka pyni, ba ka ri synshar paidbah, kaba khraw tam jong ka pyrthei, ka la shah hukum pynban ha kine ki sngi, ha ki nongsynshar ba thombor tam jong ka pyrthei.
Haba shu sngap ha u riew madan, lah ban ong, ba lada dei ban sangeh ïa ka thma, ka dei ka kamram jong ka Russia, kaba leit hiar thma nyngkong ïa ka Ukraine, ha U Rymphang 2022, hynrei lada ong ba ka Ukraine kan leit ïakren ïasuk lane ban pyndem noh ïalade ha katei ka nonghiar thma, kam sngew shongnia satia bad ka dei halor katei ka mat, ba ka mih ka jingïapher jingmut hapdeng U Trump bad kiwei pat ki ri sepngi, ba kynthup ïa ka United Kingdom, ka France, ka Germany, ka Poland, Netherlands bad bun bah kiwei kiba don ha ka lama jong ka NATO, kiba ïai pynshlur bad kyrshan bor bah ïa ka Ukraine, ba kan ïakhun tyngeh haduh kaba kut.
Haba shu peit na kitei ki jingshisha haneng, la ïohi, kumba ka America, kan lah ban sah marwei, ha kine ki saw snem ki ban wan, lada jia ba U Trump, u pynïajan ïalade bad kitei ki nongsynshar thombor bad ka jingshisha ka long ruh, ba ka thma pyrshah ïa ka Ukraine, kam dei tang ka jingïaleh ba marwei jong katei ka ri, hynrei baroh ki ri sepngi, ki kyrshan bor bah (ba kynthup ïa ka America, ha shwa jong U Trump), namar ba ki ïohi, ïa ki kam thombor jong ka Russia, ïa ki ri kiba marjan jongka, kiba la bteng ha kine ki phew phew snem ba ladep bad ki ban dang ïai jia shuh, lada ka Russia, kan pyndem ïa ka Ukraine.
Ki don shibun ki jingkynthoh ba U Trump, u itynnad ïa ka synshar thombor kaba don ha kitei ki lai tylli ki ri jong ka pyrthei, hynrei lada ka long kumta, ka pyni, ba u te ïalade u pyrkhat bakla, namar ba u don ha ka ri kaba ka synshar paidbah ka khlaiñ bha.
