Shillong, ïaïong, 02: Ka Hynñiewtrep Border Disputed Redressal Forum (HBDRF), kaba long ka kynhun jong ki seng bapher bapher, ki riewsaiñpyrthei, ki riewsaidaiñ bad ki nongïalam shnong, ha ka sngi Balang ka la kren da kaba shai ba kan ym pdiang satia ïa ka kaiphod jong ka Regional Committee halor ka shnong kiba hap hapoh ka Block I namarba kam shym la leit sorjamin wat tang shisien ruh.
Ha ka shithi ba la phah sha u Myntri Rangbah ka jylla u Conrad K Sangma, ka HBDRF ka la ong, “katkum ka khubor na ki lad pathai khubor, ngi la ïoh jingtip ba ka Sorkar ka la poi ha ka bynta kaba khatduh eh jong ka wat kaba ar ban ïapynbeit ïa u pud u sam ba dang don ha ka jingïakajia pud hapdeng ka Assam bad Meghalaya, la ïathuh ba ka Regional Committee jong ka Block-1 ka la pyndep ïa ka kaiphod bad sa ban phah noh sha ka Sorkar. Hynrei, ngi kwah ban pynpaw ïa ka jingsngewkhia bad ïa ka jingbym hun ïa ka jingtreikam jong ka Regional Committee namarba la tip ba ka Regional Committee kam shym la leh ïa ka jingsorjamin tad haduh kane ka sngi, kaba lah ban buh jingma ïa ki jinglong ba shisha.”
Ka Forum ka la pan por ban ïakynduh ïa u Myntri Rangbah na ka bynta ban ïakren sani halor ki jingshisha bad ki dulir jong ka thaiñ Block-I.
Ha ka jingïakren bad ki lad pathai khubor, u nongaitkien jong ka Forum Bah Thomas Passah u la ong, “khlem da leit sha madan, lada ka Committee ka rai ban aiti ïa ka kaiphod, ngi sngew ba ka kaiphod ka dei kaba ym shym la pynshong nongrim halor ki jingshisha. Ngi la pynpaw ïa ka jingdonkam ban ïakynduh ïa u Myntri Rangbah ban ailad ïa ngi ban ïakynduh khnang ba ngin dup lah ban batai bad ban pynshai ïa ka jinglong jingman jong ka Block-I naduh u snem 1951.”
U Bah Passah u la kdew ruh ïa ka video ha kaba la kynnoh ba u Myntri Rangbah u la ong ba ïa ka Block I bad II ladep aiti sha ka Jylla Assam kynthup ruh ïa ki dulir.
“Kane ka jingkren ka dei kaba ma bha namarba katkum ka histori ngi tip bha ba ka Block-I bad Block-II la pynngat sha ka jylla ha u snem 1951 katkum ka jingthaw ïa ka District Council ha u snem 1952 bad ha kata ka por, ngim pat ïoh ïa ka jylla lajong. Balei ïa ka Block I bad Block II la pynhap lang bad ka Karbi Anlong Mikir Hills Autonomous Council, ka pynpaw shai ba ka shu long tang ban pynsuk ha ka synshar ka khadar hynrei ym ba kine ki jaka ki hap hapoh ka Assam ne sha Mikir Hills,” u la ong bad bynrap, “naduh ki snem 1951-52, ki nongïalam na kine ki thaiñ ki la aiti bun tylli ki jingthoh sha ka Sorkar Assam bad sha ka Sorkar India bad da kaba pynshong nongrim na kata ka histori ka ïathuh ïa ngi ha u snem 1957, ka Sorkar Assam ka la thaw ïa ka Joint Survey hapdeng ka Mikir Hills bad United Khasi-Jaiñtia bad ïa ka kaiphod ruh la pyndep hynrei ka kaiphod ka shu jah rngai noh kumto. Kane ka dei ka histori kaba bniah ba ka Block I bad Block II. Kan long kaba bakla ba u Myntri Rangbah un ong ba ka Block I bad Block II ki ladei ki bynta jong ka Assam. Lada ka long kumta balei ïa ka Block I bad Block II la buh ha ka thup jong ki 12 tylli ki jaka kiba don hapdeng ka jingïakajia pud hapdeng ka Assam bad Meghalaya. Kata ka dei ka jingkylli kaba shongnia kaba ngi kwah ban kylli.”
“Ngi kwah ba ka sorkar Meghalaya kan da pynthikna ïa ki jingshisha halor kane ka kam bad ban pynthikna ba ka Block I bad ka Block-II kin wan phai biang sha ka jylla Meghalaya katkum ka jingshisha ba baroh ki shnong kiba hap hapoh ka Block I, people ki dei kiba shong basah ha ki Pnar, ki kren ïa ka ktien Pnar, ka riti ka dustur baroh ka long kumjuh bad ki nongshong shnong ka jylla Meghalayan. Baroh, ki long thik kum ma ngi. Kan long kaba bakla ban pynïasoh ïa ki bad ka Karbi Anglong,” u la ong shuh shuh.
