Ka jingkren u Chief Minister ka long khyllung khynnah: Dundee
Shillong, Naitung, 16: Ki Pulit ka Nongmensong Out Post ha ka sngi Baar ki la khot hajir ïa u Chief Organising Secretary ka Federation of Khasi Jaiñtia and Garo Peoples (FKJGP) u Bah Khrawkupar Nongsiej bad ïa u President jong ka Shillong City u Bah Arkinfield Khonglam ha kaba ïadei bad ka jingkhynra laisen ba dang shen jong ka seng ha ka thaiñ Polo, ha ka shnong Demseiñïong bad Nongmensong.
U President ka FKJGP u Bah Dundee C. Khongsit ha ka jingïakren bad ki lad pathai khubor hadien ba la mih na Nongmensong Out Post u la ïathuh ba ka jingkhynra Trading License bad Labour License ka FKJGP kam shym la ïaid lait na ka tnat Enforcement jong ka Khasi Hills Autonomous District Council, ki ophisar na ka tnat Labour bad Food and Safety ruh ki don lang.
“Kaba sngew lyngngoh ka long balei ki (Pulit) khot hajir tang ïa ki dkhot jong ka seng,” la buh jingkylli u nongïalam jong ka FKJGP bad ong, “shaei ki jah ki ophisar jong ka tnat Labour, KHADC lada ki ong ba ka jingleh jong ngi ka long kaba be-aiñ ban talasi laisen.”
“Ngi pynrem jur ïa ka Sorkar bad ngi pynrem jur ïa ka Sorkar bad kaba sngew thamula ïa kane ka jingleh jong ka Sorkar ka long lada ngi ngi pyrshang ban rat dyngkhong ïa ka jingthmu ban wan be-aiñ jong ki briew kiba nabar shapoh ka jylla hynrei pynban ka Sorkar ka ïada ïa ki. Kane ka dei ka sajia kaba ki dkhot jong ka seng ki ïoh mynta ka sngi,” la kynthoh u Bah Khongsit.
“Ka Sorkar lyngba ka tnat Pulit ka dei ban khot hajir ïa baroh ki nongbylla kiba wan sha kane ka jylla jong ngi, ki bym biang ïa ki kot ki sla katkum ka aiñ jong ka Sorkar. Ka pyni ba ki nongleh bha ki shah pynsajia katba kiba wan bylla be-aiñ sha ka jylla jong ngi ki shu ïaid suk. Nangne shakhmat, ki shnat treikam jong ka seng ha ki distrik kin nang pynjur ban khynra ïa ki Labour License,” u la ong.
Shuh shuh u la ong kum ki samla kim lah ban shu shong kli kti lada ka Sorkar kam leh eiei ai kane ka kam ïap kam im jong ka ri bad ka jaidbynriew.
U la ong ba ka seng kam pyrshah lada ki nongbylla bar jylla ki wan ban trei hapoh ka jylla ïa ki kam kiba ki trai jylla kim pat lah ban trei tangba ki dei ban da ïaid katkum ka aiñ.
Haba kynthoh ïa ka jingkren ba dang shen jong u Myntri Rangbah, u President ka FKJGP u la ong, “ka jingkren jong u Myntri Rangbah ka long khyllung khynnah lada ka aiñ kam don ka dei ka kamram jong ngi kum ki dkhot jong ka jaidbynriew kum ki sengbhalang ban dawa ïa ka Sorkar ba kan wanrah ïa ka aiñ hynrei lada ka aiñ ka don bad kam treikam ka dei ka kamram jong ngi ban tied ïa ka jingkhang jong ka Sorkar bad ïa ki tnat treikam bapher bapher ba ka aiñ ka la don.”
Haba kylli u la ong, “katkum ka jingïathuh jong u Investigating Officer (IO) ki la bun ki case ba la pynngat ïa ki dkhot jong ka seng ha ka shithi khot hajir. Lada ïa ka jingkhynra laisen jong ngi phi kein be-aiñ bad phi khot hajir, balei phim leh lang ïa kiwei pat ki ophisar na ka KHADC bad Labour.”
U la kam ruh ba katkum ka jinglap jong ka seng ha ka jingkhynra la shem ba bun na ki bar jylla kiba trei ïa kam bapher bapher kim shym la ïaid katkum ki jingpynbeit jong ka Sorkar ban leh katkum ka aiñ. “Ha kato ka seng ki ophisar ka KHADC bad ka tnat Labour ki lap pylleiñ ba ki (bar jylla) pynkheiñ balei ïa kito ka tnat Pulit kam leh eiei,” la kynthoh u Bah Khongsit.
