Ha kane ka result MP elekshon ba dang shu dep shen,ngi iohi ba ka Seng riewlum ba kham long kmie ha ka jylla jongngi,ka United Democratic Party (UDP) ka la hiar bad nangtroin shaba palat liam ha ka jingioh vote jongka.Ka jinghiar kynsan ka jingioh vote jong kane ka party ka la pynlyngngoh bad pynkyndit lut ia ki nongialam ba kham hakhmat(front leaders) jong kane ka party khamtam lei ba ka la ioh lang ia ka jingkyrshan bad jingiatrei lang bad ka party riewlum barim tam ha ka jylla,ka HSPDP.
Ki paidbah nongkyrshan ba mynshwa jong kane ka party pat,kim da sngew phylla shuh bad bun hi ruh ki la khmih lynti lypa ba kan hiar beit namar kane ka party ka la sdang duh noh ia ka jingshaniah(lost the faith and confidence) jong ki paidbah nongkyrshan ha kylleng sawdong ka ri Khasi-Khasi Jaintia jongngi.
Kawei na ki dawbah jong ka jingtroin noh jong kane ka party riewlum ba heh tam jong ka jylla ka dei hi ka jingleit kyrshan sorkar jongka ia ka sorkar MDA-II ba la lamkhmat da ka party NPP. Na ka sur jong ki paidbah ba bun,ka paw ba ki paidbah ha kylleng sawdong ka ri Khasi-Jaintia kim mon ne kim kwah shuh ba kane ka party kan iatreilang bad ka MDA-II ba la ialam da ka NPP.
Hynrei, ki katto katne ki nongialam jongka pat ki kwah bad thrang dik dik tang ban ia don bynta lang ha ka sorkar ban ioh iabam lang ia ka mluh sorkar khlem pyrkhat pat kaei ka ban jia ia ki hadien habud.Shisien ba la pyrkhat tang ia ka iohnoh mynta,ka lawei jong ka party kan long lypa kaba dum ia kano kano ka party.
Ym tang katta,ka jingleit tyrwa dohsah hadien ba la mut ban ia thaw sorkar lang para seng riewlum , ka la nang paw pen ryngkew shuh shuh ki kam khwan myntoi ki nongialam jong kane ka party..Kam pher lada shah pynshong ha tnum bus, ne shu ioh sdien ha bus MDA bad shah kren jot laiphew jait kim lei lei tang ban ioh ne don ha ka sorkar MDA-II ka biang beit ka rukom pyrkhat pyrdain jongki.Hynrei kim pyrkhat pat ba katei ka jingleh jongki kan ialam pynban iaki sha dujok jong ki kam paidbah(political hell).
Shisien ba la jah lyer( no political wave) bad la duh ka jingshaniah jong u paidbah(public confidence),ka eh ia ki party ban pynkhie-im biang ne ban ban pynthymmai biang lymda ki nongialam ki nud ban shim ia ka rai ba shynrang(bold decisions) kiba ia hap bad ki kam paidbah(important public issues). Ki jingkynoh ba bun jait bun rukom ki mih haba la thaw jot ka nusip. Don kiba ong ba la tlot bad kwah bor palat ki nongialam.Don pat kiba ong ba sngew rem,sngew jemdaw bad sngewpoh jait lada kyrshan ia kum kata ka party kaba la shah kren bein bad kren jot la kum ka dieng shain doh.
Kiwei pat ki ong ba kine ki nongialam mynta kim salia ne khein snep shuh ia ki riew rim jong ka party kiba long ki nongseng nongdang,ki nongpynheh nong- pyniar ia ka party naduh ba la seng ia ka.Don pat ki ong ba la ieng ka Hok u Bah Bindo M Lanong namar ka jingleh bein bym salia ne khein snep jongki.Kata ka la long ka bainong ne ka nongkylliang jongki ba ki ioh hakhmat u paidbah.
Tangba, ki kyntien u John Milton ka la maham lypa ia ki,kaba ong. ” Kyndit,ieng joit ne jot syndon noh thiaw”‘(Awake!!Arise!! or be perished).
