Shillong, Rymphang, 13: Ki nongkyrshan jong u MLA ka Voice of the People Party (VPP) na North Shillong Constituency u Bah Adelbert Nongrum ki la mih shakhmat ban pynshai ba balei une u MLA um shym la mih shakhmat ban leit sha ki rynsan ïalap elekshon jong ka party na ka bynta ka elekshon sha ki ar tylli ki Autonomous District Council (ADC) ha rilum Khasi bad ha rilum Jaiñtia ki ban sa long shen mynta u bnai.
Ha ka video ba la pyllait ha ka sngi Balang, uwei na ki nongkyrshan jong u Bah Adelbert u la ong, “ngi ngim don kano ka jingwit jingthmu ïa uno uno u riewshimet hapoh ka party. Hynrei kine ki riewshimet ki thaw ïa ka “system” kaba la pynlong ïa ngi ban buh ïa u dak jingkylli uba heh, kaei kane kaba phi leh? Kaei kaba ngi thoh sha ka party ba ngi kwah ban pynbeit ïa ki kynrum kynram. Haoid, ïa kaei kaba ka party ka la rai, la rai, la dep, ngi kloi ban pdiang. Hynrei ka party ka dei ban sngewthuh ba ka la bakla ïa ka rai. Ngi la ong ïa ka party ba ka jingbakla jong phi ban rai ngi ruh ngi kloi ban ïapynbeit ba ma ngi ruh ngi la bakla watla ngim don bynta ha kaba shim ïa ka rai.”
“Haduh katta ngi la kloi ban pynrit. Baroh ka Bri u Hynñiewtrep ki la kylli u jah shano u Bah Adelbert,” la pynpaw u nongaiktien na ka kynhun ba la ïalam da u Bah Adelbert ha ka jingpyllait ïa u kyrwoh lyngba ka video.
Haba kynthoh ïa kane, u Nongaitktien ka VPP u Bah Batskhem Myrboh u la ong ba kane ka sienjam jong u Bah Nongrum bad ka kynhun jong u ka long tang ka jingpyrshang ban wanrah ïa ka jingïapait hapoh ka party.
U la kam ba ka VPP ka dang ïatylli namarba dei tang u Bah Nongrum uba leh pyrshah ïa ka party.
“Kam don kano kano ka jingïapait hapoh ka party hynrei u don tang uwei, uba long pyrshah ïa ka party bad uta u dei u Bah Adelbert Nongrum,” u la ong.
Haba kdew ïa ka jingai tiket ha Jañaw Constituency, u Bah Myrboh u la kynnoh ba u Bah Nongrum u la khot lut ïa baroh kito kiba shah kyntait ban ïoh tiket bad ong, “ka paw kumba ka don ka jingïasylla pyrshah ïa ka party.”
“Ka jingkylli kaba mih mynta ka long hato ki briew kin shaniah ïa ka party, kaba dang ïatylli, hato kin shaniah ïa baroh ki dkhot jong ka State Executive Member (SEC), kiba ïatylli laitnoh tang uwei u MLA lane hato ki paidbah kin sngap ïa ka kynhun jong ki katto katne kiba ïaleh pyrshah ïa ka party? Hato phin kyrshan ïa kita, kiba donkti ban ai khubor sha ka NPP bad kiba ai jingtip ïa ki kam iing kam sem jong ka VPP sha ki nongïalam ka NPP,” la kynnoh u Bah Myrboh.
Haba kynthoh shuh shuh ïa u Bah Nongrum, u nongaitkien ka VPP u la ong, ‘u MP ka Shillong u Dr. Ricky AJ Syngkon uba long ruh u General Secretary u ladep phah ïa ka shithi sha baroh saw ngut ki MLA ban bthah ba ki dei ban pyntreikam janai ïa ki skhim jong ki. Ngi ïaroh ïa ki lai ngut ki MLA kiba burom ïa ka shithi jong ka SEC kaba pynthikna ïa ka jingtreikam kaba khuid bad kaba shai haba pyntreikam ïa ka skhim MLA hynrei ki paidbah ki buh jingkylli ba balei tang uwei u MLA u kham pher na kiwei pat haba pyntreikam ïa ka skhim MLA.”
“Kane kam dei shuh ka sien kaba nyngkong. Ngi la rai ban pynieng ïa u Dr. Ricky AJ Syngkon, ujuh hi u briew uba buh jingkylli ïa ka rai jong ka party ban pynieng ïa u Dr. Syngkon hynrei ha kato ka por ngim kwah ban da pynpaw than ïa ki kam iing kam sem jong ka party,” u la ong.
Katkum ka jingong jong u, u Bah Nongrum u la pynpaw sha ka party ba u kwah ban ïakhun ïa ka elekshon MDC watla um shym la aplai ïa ka tiket.
Haba kylli, u Bah Myrboh u la ong ba ka party kam don jingthmu ban beh seng ïano ïano hynrei kan pyrshang ban ïakren da ka jingïasngewthuh jingmut.
Shuh shuh u Bah Myrboh u la kynnoh ruh ba u Bah Nongrum u la rah bun tylli ki aiñ-rew ha Ingdorbar Thawaiñ kaba la long pyrshah ïa ka nongrim treikam jong ka party.
Ha kajuh ka por, u la kynnoh ruh ba u Bah Nongrum ula phah ïa ki jingai jingmut halor ka State Reservation Policy, kaba ïapher na ka jingai jingmut jong ka party.
