Shillong, ïaïong, 03: Ka Chief Secretary barim jong ka jylla Meghalaya Kong Rebecca V. Suchiang ha ka sngi Palei ka la bam smai kum ka Chief Information Commissioner (CIC) ba thymmai jong ka jylla na ka bynta ka samoi treikam kaba lai snem.
Ïa ka Kong Suchiang la pynbam smai da u Lat ka Jylla u CH Vijayashankar ha ryngkat ka jingsakhi lang jong ki ophisar ka Sorkar Jylla bad ki bahaiing hasem jong ka Kong Suchiang ha ka jingïalang kaba la long ha Raj Bhavan, Shillong.
Kum ban shu pyntip hangne ba ka Sorkar dang shen ka la ai jingmynjur ban thung ïa ka Kong R.V Suchiang kaba dei ka ophisar IAS ba la shongthait hadien ba ka shuki Chief Information Commissioner ka la shu sah thylli na ka jingshongthait noh jong u Bah H. Nongpluh uba long u ophisar IPS ha ka 14 tarik, Naiweng, 2024.
