Nongpoh, Naiwieng, 21: Ka North Eastern Police Academy (NEPA) ha ka sngi baar ka la pynbam smai ia ki 377 ngut ki Ophisar Pulit kiba kynthup ia ki Deputy Superintendents of Police (Dy. SP) bad ki Sub-Inspectors (SI) kiba dei na ka Jylla Assam, Arunachal Pradesh, Mizoram, Tripura bad Nagaland.
Kane ka jingpynbam smai ka long hadien ba kane ka kynhun ne 52nd Batch ki la pyndep pura ia ki jingshah hikai pyntbit.
Na kine ki 377 ngut, 82 ngut ki dei ki Dy. SP bad 295 ngut ki dei ki SI, kata 331 ngut na Assam, 9 ngut na Arunachal Pradesh, 8 ngut na Mizoram, 21 ngut na Tripura bad 8 ngut na ka jylla Nagaland.
U Myntri Rangbah ka Jylla Assam u Himanta Biswas Sharma u la long u kongsan ha kane ka sngi. U Director jong ka North East Police Academy, u Gya Nendra Pratap Singh u la pynbam smai ia ki ophisar kiba la pyndep ia ka jingshah hikai pyntbit ha NEPA.
Ki bahaing hasem jong kine ki Pulit, ki Ophisar Pulit jong ka NEPA, Meghalaya, bad Assam ki la sakhi lang ha kane ka sngi ba la pynlong ruh ia ka passing out parade ba la shim salute da u Himanta Biswas Sharma.
Haba kren kum u Kongsan u Himanta Biswas Sharma u la ai khublei ia ki Ophisar bad ia ka jingtrei shitom jong ka NEPA bad ia u Director u Gya Nendra Pratap Singh. U la ong ba ka kam jong ki Pulit Ophisar ka long ban shakri ia ka ri bad ban noh ruh ia u synñiang u bynhei na ka bynta ka bha ka miat jong ki paidbah ha ka imlang ka sahlang.
“Ki ophisar kiba iashim bynta ha kane ka Passing Out Parade ki la plie lynti hi dalade ialade. Ki la pyndep ia ka jingshah hikai pyntbit bad manla ka jinghikai ka long kaba kongsan namarba kan long ka jingmyntoi ban ai jingshakri ha ka ri,” u la ong.
U Sarma u la iaroh ruh ia ka jinglen lade jong ka tnat Pulit ha ka ri baroh kawei bad pynpaw ruh ia ki kam ba ki la leh ban pynneh pynsah ia ka shongsuk shongsaiñ, ban tohkit ia ki kam runar, ban iarap ruh ia ki paidbah haba wan kino kino ki jingshah lynshop na ki bor jong ka mariang.
