Shillong, Rymphang, 27: Ki 58 ngut ki MDC ba la shah jied thymmai sha ki ar tylli ki Autonomous District Council (ADC) ha rilum Khasi bad Jaiñtia ki la shah pynbam smai ha ka sngi Palei.
La pynbam smai ïa ki 29 ngut ki dkhot jong ka Khasi Hills Autonomous District Council (KHADC) da ka Deputy Commissioner jong ka East Khasi Hills District ka Kong RM Kurbah ha ka jingïalang kaba la long ha Iingdorbar Thawaiñ ryngkat ka jingsakhi lang jong ki nongkyrshan bad ki bahaiing hasem jong ki MDC.
U CEM barim ka KHADC u Bah Titostarwell Chyne uba long u MDC jong ka United Democratic Party na Sohra u dei tang ma u marwei uba la bamsmai ha ka ktien Khasi katba kiwei pat ki dkhot ki la bam smai beit ha ka ktien Phareng kumba la pynkhreh.
Lai ngut ki MLA, kata arngut na ka UDP ba kynthup ïa u Bah Synshar Roy Kupar Lyngdoh na Nongspung-Sohiong bad u Bah Pius Marweiñ na Langrin lem bad u Bah Sosthenes Sohtun na ka National People’s Party (NPP) na Jirang ki la bam smai ha kane ka sngi kum ki dkhot ba thymmai jong ka Council.
Ha kane ka sngi, saw ngut ki kynthei ba la shah jied kum ki MDC sha ka KHADC ki la shah pynbam smai. Arngut ki dei na ka Voice of the People Party (VPP), kata, ka Kong Deiti H. Majaw na Laitumkhrah-Malki bad ka Kong Aibandaplin L Nonglait na Mylliem bad arngut na ka NPP ba kynthup ïa ka Kong Grace Mary Kharpuri na Nongshken bad ka Kong Rona Khymdeit na Nongpoh.
Baroh 17 ngut ki MDC jong ka VPP ki dei ki khmat thymmai kiba la shah jied ha ka sien banyngkong eh kum ki dkhot jong ka KHADC.
Ha West Jaiñtia Hills u Deputy Commissioner AK. Singh u la pynbam smai ïa ki 29 ngut ki dkhot jong ka Jaiñtia Hills Autonomous District Council (JHADC).
U CEM ka JHADC Bah Thombor Shiwat ryngkat bad ki saw ngut ki CEM barim ba kynthup ïa u Bah Hambertus Nongtdu, Bah Madonbai Rymbai, Bah Andrew Shullai bad u Bah Moonlight Pariat ruh ki la shah pynbam smai.
Ka NPP ïa mynta ka don 14 ngut ki MDC, 8 na ka VPP, 3 na ka UDP, 3 na ka Congress bad uwei u Independent.
