Shillong, Nailur, 16: Phra ngut ki khmat ba thymmai ki la bam smai kum ki Myntri ha ka sngi Baar, ha kaba u Myntri Rangbah ka Jylla u Conrad K Sangma u la pynpaw ïa ka jingdonkam ban pynbeit ryntih ïa ki jingangnud jong ki thaiñ, ka jingdon ki nongmihkhmat na ki distrik bad ki jingkular jong ka kynhun synrop ha ka rukom shim rai jong u.
Ïa ki phra ngut ki Myntri la pynbam smai da u Lat ka Jylla u C.H Vijayashankar ha ka jingïalang kaba la long ha Raj Bhavan da ka jingsakhi lang jong u Myntri Rangbah, ki Symbud Myntri Rangbah, ki Myntri Sorkar barim, ki MLA bad kiwei kiwei.
Ki Myntri ba thymmai kiba la bam smai ki kynthup ïa ki saw ngut ki MLA jong ka National People’s Party (NPP) – Bah Wailadmiki Shylla (Jowai), Bah Sosthenes Sohtun (Jirang), u Brening A Sangma (Dalu) bad u Timothy D Shira (Resubelpara), ar ngut na ka United Democratic Party (UDP) ba kynthup ïa u Bah Lahkmen Rymbui (Amlarem) bad u Bah Metbah Lyngdoh (Mairang), u MLA ka HSPDP Bah Methodius Dkhar (Mawshynrut) bad u MLA ka BJP u Bah Sanbor Shullai (South Shillong).
Ha ka jingïakren bad ki lad pathai khubor hadien ba la wai ka jingpynbam smai, u Conrad K Sangma u la pynshai ba ki don bun ki daw kiba la pynlong ïa u ban bujli shuki ha ka Kynhun Myntri, da kaba pynpaw ruh ba ka long kaba donkam ban pynryntih lang katkum ka jingangnud ki paidbah, ka jingdon ki nongmihkhmat na ki District bad ki jingkut jingmut jong ka kynhun synrop.
“Hooid, ka dei ka jingpynthymmai kaba heh bad sa shisien pat la leh namarba ngi don ïa ka jingbun paid, ngi la jan dap 50 ngut tam bad kumta da kaba buh ïa kita ki jingkheiñ ha ka jingmut ngi hap ban pynïahap ïa ka bynta baroh kawei ban pynbiang ïa ki jingangnud jong ka thaiñ bad ki jingangnud jong ka distrik bad ban buh ïa kita kiei kiei baroh ha ka jingmut jong ngi da kaba leh ïa kaba bha tam,” u la ong.
U Sangma u la ong ruh ba ka NPP ka la bat skhem ïa ka jingkular jong ka ha ki paralok ba ïatreilang, watla ka don ïa ka jingbun paid ha la ka jong ka jong ka bor.
“Watla ka NPP ka kham bun paid, ngi don 33 ngut ki MLA hynrei ngi hap ban ïasngewthuh jingmut bad ki paralok kiba ngi ïatreilang, ngin ym pynkheiñ ïa ka jingkular kumba la khlei ha u snem 2023, wat hapdeng ka jingkylla jong ka saiñhima sima ha ka jylla ka NPP ka la lah ban ïoh ïa ka jingbun paid bad ngi bat ruh ïa kata ka jingkular,” ula ong bad bynrap, “ha kaba ïadei bad ki tnat ba la bat da ki paralok ba ïatreilang, ngi ladep ban ïasyllok lang bad ki bad katto katne ki la don ki jingïasngewthuh jingmut ba kan don ka jingkylliang Myntri shiteng samoi bad kata ka dei ka jingïasngewthuh jingmut kaba don hapdeng jong ngi bad da kaba pynshong nongrim halor kata ngi la ïaid shakhmat. Ki don ki khep ba ki la ïakren hi hapoh ka party bad ki la wan pynsngew pat ha nga.”
U la ong ruh ka jingphaikhmat ba kyrpang ka long na ki thaiñ bapher bapher kynthup ïa ka Ribhoi bad ka West Garo Hills khnang ban pynurlong ïa ka jingangnud jong ki paidbah.
U la pynpaw ruh ïa ka jingsngewskhem ba ki Myntri ba thymmai ba dang shu dep bam smai kin dup lah ban noh synniang sha ka jylla bad kumjuh ruh ki Myntri ba la kham rim kin long ki nongïalam lynti ha ka jingbynshet ïa kamram.
Ha kajuh ka por, u Myntri Rangbah u la pyntip ba ka jingbate kam ïa ki Myntri ba thymmai ka don hapdeng ka jingpynkhreh bad ïa kaba yn sa phah sha ka Secretariat jong u Lat ka Jylla.
Ka jingpynbna ïa ka jingbate kam la khmihlynti ban pynmih ha ka sngi Balang.
