New Delhi, Jylliew 25: U Dr. Ricky Andrew Jones Syngkon bad u Saleng Sangma, ki arngut ki MP jong ka Lok Sabha na Meghalaya ki la bam smai ha ka sngi Baar kum ki dkhot jong ka Lok Sabha.
Kine ki arngut ki la bam smai da ka ktien Phareng ha ka kyrteng U Blei. Hynrei ka don ka jingïapher pat ha ka jingpynkut ïa ka jingbamsmai. U Dr. Ricky, u la pynkut da kaba ong “Thank you…Khublei Shibun and Mithela” katba u Saleng pat u la pynkut da kaba ong, “Save Constitution” lane “Ïada ïa ka riti synshar” da kaba rah ia ka kopi jong ka Riti Synshar ha ka kti.
Kine ki arngut ki la shim smai ryngkat bad kiwei pat ki MP ba pawkhmat jong ka ri India ba kynthup ïa u Rahul Gandhi, MP ka Congress na Rae Bareli, u Akhilesh Yadav MP ka Samajwadi Party, ka Supriya Sule ka MP ka NCP (Sharad Pawar), ka Mahua Moitra ka MP jong ka Trinamool Congress na West Bengal bad kiwei kiwei.
Ha kane ka jingbam smai jong u MP jong ka Shillong Seat, la synran lang da u President ka VPP Bah Ardent Miller Basaïawmoit, u Bah Brightstarwell Marbañiang MLA ka Mawlai kiba la shong ha ka Parliamenterian Gallery jong ka Lok Sabha bad la don lang ruh ki bahaïing hasem u Dr. Ricky.
Ha kajuh ka por ka ri India kan ïohi ba ha ka sien kaba nyngkong eh hadien bun bun snem ban don ka elekshon ban jied ïa u Speaker jong ka Lok Sabha, namar ba ka NDA ka la rai ban pynïeng ïa u Om Birla, uba long u Speaker ruh jong ka Lok Sabha kaba ladep. Katba na liang ka INDIA Bloc, ki la rai ban pynïeng ïa u Kodikunnil Suresh, MP ba la rim tam jong ka Lok Sabha.
