Shillong, K’lyngkot, 24: Hynriew tylli ki dukan kiba don ha ka shnong Trekhim, Shangpung Pohchnong, West Jaintia Hills District ha ka miet shiteng synnia ka sngi Palei ki la kylla dpei tang ha ki shikhyllipmat hadien ba ki thylliej ding barhem ki la bamduh ïa kine ki dukan hapdeng ka jingklang jong ka ding ba shyrkhei.
Ki trai jong kine ki dukan ki la ïathuh ba ka jingjulor ha kane ka jingjia ka la kot ym duna ïa ki phew lak tyngka. Kat haduh ba la thoh ïa kane ka khubor ym pat lah satia ban tip ïa ka daw jong ka jingsdang kem ding jong kine ki hynriew tylli ki dukan.
Kine ki hynriew tylli ki dukan ki dei jong u Bah Hei Theij Suïam, u Bah Prosperly Suïam, ka Kong Mietmon Law, Kong Bino Shullet, Bah Pynhoi Langbang bad Kong Ai Sungoh.
Ki paidbah nongshong shnong kiba sah mar jan tang shu ïohi ïa ka jingklang jong ka ding ki la pyrshang ban pynlip ïa ka ding haduh ka por mynstep bad da ka jingwan poi jong ki ar tylli ki kali pynlip ding ka tnat Fire and Emergency Service la lah ban pynlip ïa ka ding kaba la bamduh lut ïa baroh ki jingdon jingem hapoh ki dukan.
La pyntip ba kine ki dukan ki dei kiba die sha, shna furniture, dukan shna kisar, dukan die jaiñ bad juti bad kiwei kiwei.
