Shillong, ïaïong, 06: Ki thylliej ding kiba rhem ki la bamduh bad pynkylla dpei ïa ka ïing jong ka Kong Rishalin Nongsiej ha ka shnong Mawklot Sohbir, Upper Shillong East Khasi Hills District.
U Rangbah Shnong jong ka shnong Mawklot ula ïathuh ba kane ka ïing ka la sdang ban kem ding na ka jingthut jong ka bording ha ka por 9:00 baje mynstep ha ka sngi Saitjaiñ bad baroh ki jingdon jingem ki la kylla dpei lut tang ha ka shikhyllipmat namarba ki kali pynlip ding jong ka tnat Fire and Emergency Service ki dang poi hadien shikynta duna.
U la ïathuh ruh ha ka por ba la jia kane ka jingpluh jong ka iing ym shym la don mano mano ruh ba mynsaw bad baroh ki la lait na ka jingjia ba sngewsih tangba ka jingjulor jong ka iing ka la kot da ki lak tyngka.
