Shillong, Risaw, 5: Ki nongseng skul kiba don hapoh ka lama jong ka Meghalaya Schools Welfare Development Association (MSWDA) kaba kynthup ruh ïa ki Principal, ki Headmaster, ki Headmistress bad ki dkhot jong ki School Managing Committee (SMC) ki la pdiang ïa ka Meghalaya Education Grant (MEG) ba la tyrwa da ka tnat Pule Puthi ka Sorkar Jylla ban pyntreikam ha ka jylla Meghalaya baroh kawei.
Ïa kane ka rai, la shim ha ka jingïalang kaba la long ha ka 1 tarik mynta u bnai ha Khasi National Dorbar Hall, Mawkhar, Shillong.
U President ka Association u Bah Hamarbamut Marbaniang u la ïathuh, “ngi pdiang ïa ka jingpyntreikam ïa ka MEG ryngkat bad ki katto katne ki jingai jingmut ban pynbha shuh shuh. Hadien ba ngi ïohi ïa ka jingpyrshah ngi artatien la ka Sorkar kan pyntreikam neem ïa ka MEG.”
U la ïathuh ba ha ka jingïalang la ïatai sani halor ki skul ki bym mon ban aiti ïa ka Management sha ka Sorkar ïa kiba la pynïaid da ki mishon bad kino kino ki kynhun kiba haduh mynta ki dang ïoh ïa ka jingïarap na ka Sorkar kum ka Grant in-Aid.
“Kaba ngi ïapyrkhat mynta ka long, kan jia aiu lada la pynrung ïa ka SSA sha ka Sorkar bad ïa kine ki skul yn ithuh kum kiei pat?” u la ong.
“Ka don ka jingsngewshngaiñ lada ka Sorkar ka pyntreikam ïa ka MEG namarba yn sa ithuh ïa ki skul tang ar jait, kata, ki skul sorkar bad ki Govt. Aided School kiba ïoh jingïarap na ka Sorkar lyngba ka MEG,” la ong u Bah Marbaniang.
Katkum ka jingïathuh jong u Bah Marbaniang ha ka jingïakynduh dang shen ïa u Commissioner and Secretary ka tnat Pule Puthi u Vijay Kumar Mantri, ka Sorkar kan ïarap ïa ki skul sa tang da ka lynti ba ki pdiang ïa ka Meghalaya Education Grant. “Dei sa tang kane ka lynti kaba ngi lah ban ïoh ïa ka jingïarap na ka bynta ki skul ha ka kyrdan Secondary bad Higher Secondary kiba ym pat ïoh jingïarap eiei na ka Sorkar,” u la bynrap.
“Mynta ngi hap ban ïa pyrkhat lang ïa ka jingïabiang lang bad ym ban pyrkhat tang ban myntoi ka malade shimet. Ngi dei ban ai jingmut kumno ban pynbha na ka bynta ka jingpyntreikam ïa ka MEG. Ngi ïohi ba dei tang ka MEG ka lad kaba lah ban weng ïa kiba bun ki jingeh,” u la ong shuh shuh.
U la ïathuh ba ka Association kan sa aiti sha u Myntri ka tnat Pule Puthi u Bah Lahkmen Rymbui halor ka rai ba la shim ha ka jingïalang.
“Ngin sa ïa phylliew jingmut bha bad u (Myntri ka tnat Pule Puthi) ruh bad lada donkam ngin sa leit ruh sha Myntri Rangbah ka jylla. Namar kumba ka long mynta, na ka liang jong ngi ki nongpynïaid skul ngi la shimkhia bha bad ngim kwah ban shu ieh ïa kane ka kam ban ïakren tang bad ki nonghikai kiba mih tang ha surok hynrei ngi kwah ban leit sha ka miej jingïakren ban pynwandur ïa ka pule ka puthi,” la pynpaw u Bah Marbaniang.
U la pynpaw ruh ba kum ki nongpynïaid skul ki mad ïa kiba bun ki jingeh naduh ka sngi ba la seng ïa ka skul ban pynbiang ïa kiba bun ki jingdonkam la ka dei ha ka jingpynbiang ïa ki kamra klas, ki nonghikai bad kiwei kiwei.
“Ynda la pynbiang ïa ki jingdonkam yn sa ïoh pat sa ka jingithuh bad ynda la ïoh pat ïa ka jingithuh ngim pat lah ban ïoh ïa ki jingïarap. Kaba kongsan ka long ba ka Sorkar ka dei ban ïatreilang bad ngi ki nongpynïaid skul lada ka kwah ïa ka jingkiew ka pule puthi,” u la ong.
