Shillong, Lber, 24: U Symbud Myntri Rangbah uba khmih ïa ka tnat Transport Bah Sniawbhalang Dhar ha ka lah Sngi u Blei u la pyntip ba ka Sorkar Jylla shen kan sa pynmih noh da ka jingpynbna ban pyrkhing ïa ka jingniah stet shaba palat ïa ki kali ba surok da ka jingthmu ban ïada ïa ka jingim jong ki mynsiem bakordor, ban pynduna ïa ki jingjia aksiden bad ba ki nongïaid lynti kin shngaiñ ha ka leit ka wan bad ka ïaid ka ieng.
Haba kren sha ki lad pathai khubor, u Bah Dhar u la ong ba u la lum jingïalang ïa baroh ki tnat treikam ka Sorkar ha kaba ïadei bad kane ka kam ban ïada ïa ki nongniah kali bad ïa ki nongïaid lynti ha surok.
U la ong, “ngi dang bishar ïa kata bad hapoh ar ne lai bnai, ngin sa lah ban pynmih da ka jingpynbna ban tehlakam ïa ka jingniah stet ki kali saw shaka bad ki kali ar shaka ha ki surok shnong bad ki surokbah”
“Ngi la kyrpad ruh ïa ka tnat Pulit ban pyrkhing bha ïa kino kino kiba pynher stet shaba palat ïa ki kali saw shaka bad ar shaka,” u la bynrap.
U Symbud Myntri Rangbah u la pyntip ba la bthah ïa baroh ki tnat trekkam ba kin shim ïa ki lad ki lynti kumno ban ïada ïa ki jingjia aksiden ha ki jaka ba ju jia khahkhah.
“Ki don katto katne ki jaka ba ki aksiden ki ju jia khahkhah bad ngi la bthah ban pynbeit noh mardor ïa kane khnang ban pynthikna ba kum kine ki jingjia aksiden kin ym jia shuh hadien habud,” u la ong.
