Shillong, Nailar, 14: U Myntri Rangbah ka Jylla u Conrad Kongkal Sangma ha ka sngi Balang u la pynbna ba ka Sorkar kan sa thung da ki trai shnong kum ki ‘Tourist Assistants’ ki ban sa long ki nongkdew lynti ïa ki nongjngohkai pyrthei, ki nongïada bad ki nongai jingtip sha ki nongjngohkai pyrthei.
“Kane ka thong kan pynlong ïa ki nongjngohkai pyrthei ba kin don ka jingsngew shngaiñ bad ban pynthikna ba kin ïoh ïa ki lad jingtip kiba thikna bad kiba dei,” u la ong haba kren ha ka jingïalang bad ka kynhun ki nongpynïaid ïa ki kam jngohkai pyrthei kaba la long ha State Convention Centre, Shillong.
Kane ka sienjam ka long ruh ban thaw ïa ki lad aijam aijam ïa ki samla trai shnong ha ki jaka ba don ki jaka jngohkai pyrthei.
U Myntri Rangbah u la pynkynmaw ruh ïa ka jingjia ba dang shen kaba la ktah haduh katta katta ïa ka kam jngohkai pyrthei da kaba pynksan ba ka dei ban don ka jingïatreilang na baroh.
“Ngi dei ban ïatreilang ryngkat ban pynrem jur kum ïa kito ki jingjia bad ban kyntiew ïa ka jinglong kaba bha ha ka kam jngohkai pyrthei,” u la ong.
Ngi la ïatreilang bad ki nongsynshar shnong bad ki kynhun bapher bapher ha ka jingïakren ban pynkhlaiñ ïa ka kam jngohkai pyrthei ha ka jylla. “Ha kine ki hynriew snem ba ladep, ka Sorkar ka la wanrah buh kam ki kam pynroi ha ka kam jngohkai pyrthei bapher bapher ban pynpaw pyrthei ïa ka kyrteng jong ka Meghalaya,” u la bynrap.
U la kyntu ïa ki nongïashim bynta ban ai jingmut na ka bynta ban pynroi shuh shuh ïa ka kam jngohkai pyrthei.
“Ka jingthmu jong ngi kam dei tang ban pynbun ïa ki nongwan jngohkai pyrthei hynrei ban thaw ruh ïa ki lad kiba pynsah jingkynmaw ïa ki nongjngohkai pyrthei,” u la ong.
U la ïathuh ba ka sorkar ka dang pynbha ïa ki jingtei bad ki jaka jngohkai pyrthei, kynthup ïa ki Hotel, ki jaka sah, ki jaka bam, ki jingpynbyrngia kum ka Skywalk bad ki Museum.
Ka nongbah Shillong bad kiwei kiwei ki jaka jngohkai pyrthei ki ïoh ïa ka jingpynkylla dur da ki jingtei kiba thymmai ban pynitynnad ïa ka jingitynnad jong ki.
Ha kane ka jingïalang, u Myntri Rangbah ka jylla bad u Myntri ka tnat Jngohkai Pyrthei u Bah Paul Lyngdoh ki la pyllait paidbah ïa ka almanak jong ka Autumn Tourism Calendar, ha kaba la kynthup ïa ki tarik na ka bynta ka Shillong Literary Festival kaba la ap khmih lynti ban pynlong ha ka 12-14 tarik Naiwieng, ka Shillong Cherry Blossom Festival ha ka 15-16 tarik, Naiwieng, ka Me’gong Festival ha ka 29-30 tarik, Naiwieng, ka The Hills Festival ha ka 6-7 tarik, Nohprah, ka jingwan iuhkjat jong u nongrwai ba pawnam u Bryan Adam sha India ha ka 10 tarik Nohprah bad ka Winter Tales ha ka 12-14 tarik, Nohprah.
La pynbna ruh ïa ka jingïatreilang kaba thikna bad ka Japan kum ka ri paralok na ka bynta ka Shillong Cherry Blossom.
Kum shi bynta kane ka jingthmu yn thaw ïa ka Japan Zone ka ban pyni ïa ka jingpher bad ka kolshor ba riewspah jong ka ri Japan.
