Shillong, Risaw 31: Ka Sorkar jylla ha ka sngi Thohdieng ka la pynbna ba kan pynsdang noh ïa ka jingai jinghikai ïa ki khynnah kynthei ba kin nang ban ïada ïalade ne self-defence training program ha baroh ki skul kiba don ha jaka nongkyndong bad jaka sor jong ka Jylla baroh kawei.
Haba ïadei bad kane ha ka sngi Thohdieng, u nongaibuit ka tnat Social Welfare u Bah Paul Lyngdoh ula ong, “Yn sa pynsdang noh ïa ka self-defence training program ïa ki khynnah kynthei ha ki skul ha ki jaka nongkyndong bad jaka sor ha ka dur jong ka mission bad kan don ka jingïatreilang hapdeng ka tnat Pulit bad ka Tnad Sports & Youth Affairs”.
U la ong ruh ba ka Sorkar kan wanrah ruh ïa saw tylli ki working women hostel ha Shillong, Jowai, Ri-Bhoi bad Tura. Ka jingthmu jong kine ki hostel ka long ban ai ïa ka jingsngew shngaiñ bad ka jingkyrshan ïa ki kynthei ba la trei la ktah ha ki rukom bapher bapher.
U la ong ba ka tnat ka la pyntreikam ruh ïa ka helpline nombor ba treikam 24 kynta shisngi-181, na ka bynta ki kynthei kiba shah thombor ha la ïing ha la sem bad kiwei kiwei ki jingdonkam.
U la pyntip ruh ba ka Sorkar kan kyntiew kyrdan bad pynshna ruh ïa ki paiñkhana ha ki skul ha ryngkat ka jingïatreilang bad ka DRDA bad ka tnat Pule Puthi.
U nongaibuit ula pynbna ruh ba ka Sorkar kan sa sam manla ka por ïa ki sanitary pad ba shna hi ha Jylla sha ki samla kynthei ba dang khie dang san ha ki skul, haba pynleit jingmut bha sha ki jaka nongkyndong ruh kumjuh.
