Shillong, Nailar, 25: U MP ka Congress na Tura u Saleng A Sangma u la buddien ha kaba ïadei bad ka jingpynheh ïa ka kad liengsuiñ Baljek kaba don ha Tura, West Garo Hills District khnang ba ki liengsuiñ kiba heh kin dup lah ban hiar khyndew.
Ïa mynta kane ka kad liengsuiñ ka la thmu ban pynher tang ïa ki liengsuiñ barit kiba shong tang 20 ngut hapoh ka skhim UDAN, hynrei u Sangma u ngeit ba ka lah ban pynher ïa ki liengsuiñ kiba kham heh da kaba pynheh ïa ka kad liengsuiñ.
“Nga la dep thoh da ka shithi sha u Myntri Rangbahduh bad u Myntri ba dei peit ban pynher ïa ka liengsuin kaba ngiam tang 20 ngut sha ka liengsuin kaba ngiam 75 ngut khnang ba kan long ka jingmyntoi ïa ka jylla,” ong u MP ha ki lad pathai khubor ha ka Lah Sngi u Blei.
U Sangma u la ïathuh ruh ba ka Sorkar Meghalaya dang shen (ha ka 6 tarik, Jymmang) ka la ïasoi ïa ka Memorandum of Understanding (MoU) bad ka Airports Authority of India (AAI) ban pynlong ïa ka kad liengsuiñ Baljek kaba treikam.
Hynrei u la ong ba ka Baljek Airport kam shym la don ha ka map jong ka AAI shwa ka MoU, kaba la buh jingkylli ïa ka jingpynheh ïa ka kad liengsuiñ.
“Nga la kylli shaphang ka jinglong jingman jong ka kad liengsuiñ Baljek ha ka jingïalang kaba la long ha New Delhi ha u bnai Nohprah mynshem snem. Ka jubab kaba nga ïoh ka long ba ka AAI ha ka jingïalang kaba la long ha Lakshadweep ha u bnai Kyllalyngkot ka la ong ba ka kad liengsuiñ Baljek kam don satia ha ka map jong ka AAI.”
“Namarba ka Sorkar Meghalaya ka la ïasoi ïa ka MoU bad ka AAI, ka kad liengsuin Baljek mynta ka lah ban long (ba la kynthup lang ha ka map). Mynta, ki dang pan laisen. Ha katei ka por, ym shym la don kano kano ka laisen kaba la ïoh da ka Sorkar Meghalaya. Ka kad liengsuiñ Baljek ha kata ka por ka dei ka kad liengsuiñ jong ka jylla bad kam dei hapoh ka AAI,” ong u Sangma.
U la buh jingkylli ruh da kaba ong, “ngam tip kumno ki (sorkar Meghalaya) la wanrah ïa ka President (barim) ka Pratibha Patil ha kata ka por…khlem kano kano ka laisen kaba biang.”
Haba kylli, u Sangma u la ong ba ka Sorkar Jylla ka la ïasoi ïa ka MoU tang na ka bynta ki liengsuiñ rit kiba ngiam 20 ngut kaba long pyrshah ïa ka jingkhmih lynti jong ki paidbah ba dei ban pynheh ïa ka kad liengsuin na ka bynta ban hiar ki liengsuin kiba kham heh.
U MP u la pynpaw ruh, da kaba pynheh bad pynthymmai khyndiat ka kad liengsuiñ Baljek kan ïasyriem bha bad ka kad liengsuiñ Lakshadweep.
Lah ban kdew ba ka AAI ka la pan jaka shuh shuh na ka bynta ka jingtreikam ba pura bad ka Sorkar Jylla ka la mynjur ban shim 125 akar ha ka Phase-I bad sa 115 akar na ka bynta ka Phase-II.
Ka thong ba mardor ka long ban pyntreikam ïa ka kad liengsuin na ka bynta ki liengsuin kiba ngiam 20 ngut, ryngkat bad ka jingthmu ban pynbha ïa ka khnang ban lah ban pdiang ïa ki liengsuin ATR-72 ha ki snem ban sa wan.
Kham mynshwa, u Myntri Rangbah ka jylla u Conrad K. Sangma u la pynpaw ïa ka jingsngewskhem ba ïa ka kad liengsuin Baljek yn sa lah ban pyntreikam noh ha u snem 2026.
