Shillong, Jymmang, 06: Ka Sorkar Jylla ka la bthah ïa ki Deputy Commissioner jong ka rilum Khasi bad Jaintia ban ïakren pynbeit noh kham kloi bad ïa ki trai khyndew khnang ban ïoh shna pyndep ïa ka jingker sainar ha shilynter ka khappud Indo-Bangladesh.
Ïa kane ka rai la shim ha ka jingïalang ba la pynïaid da u Symbud Myntri Rangbah uba khmih ïa ka tnat Kam Pohing Bah Prestone Tynsong ha ka sngi Baar ha ka ryngkat ka jingsakhi lang jong u Inspector General ka tnat shipai BSF Meghalaya Frontier bad ki ophisar na ka NBCC.
Ka jingïathir ïatai halor ka jingker sainar shiah ïa ka khappud ka long halor ka jinglong jingman hapoh ka ri.
“Nga la shong ïa ka jingïalang pyrkhat kam bad baroh ki District Collector bad nga la bthah ïa ki bad nga ngeit skhem ba hapoh khyndiat taiew naduh mynta, ngin sa lah ban ïapynbeit ïa ka jingshim jaka,” ong u Bah Tynsong ha ka jingïakren bad ki lad pathai khubor.
“Ngi da kwah shisha ban pyndep noh kham kloi katba lah ïa kito ki jaka bym pat ker sainar namar da ka jingdon ka jingker, ki tnat treikam ka Sorkar Jylla bad ka Sorkar Pdeng kynthup ïa ki shipai BSF kin kham suk ban peitngor ïa ka khappud namarba ka jingsngewkhia ka long ïa ka jingrung jingmih laitlan jong ki briew kiba nabar ri,” u la ong.
Katkum ka jingong jong u, na ka daw ka jingeh ban ïoh jaka, kumba 33-34 kilometer ka khappud ha West Jaiñtia Hills ym pat lah ban ker sainar bad kumba 7-8 kilometer ka jingker sainar ka dang sahteng ha East Khasi Hills district.
Haba kylli, u Bah Tynsong u la ong, “nga ladep phah ïa ki Deputy Commissioner jong ka East Jaintia Hills bad West Jaintia Hills bad ïa kiwei kiwei ki district ba kin khmih bniah biang bad ban shim ïa kane ka mat kum ka kam bahakhmat eh namarba phi tip bha ïa ka jinglong jingman ba mynta hapoh ka ri baroh kawei bad khamtam eh ïa ki jylla jong ka thaiñ Shatei Lammihngi, kaba don markhap bad ka ri Bangladesh kam pat long kaba biang.”
Halor ka jingdawa ban pynieng ïa ka jingker sainar na u mawpud (zero line) u Symbud Myntri Rangbah u la ong ba ka Sorkar Jylla ka ladep thoh sha ka Ministry of Home Affairs (MHA) halor kane ka kam.
“Watla katkum ki kyndon, u pud uba pynïakhlad ïa ki ri ha ka pyrthei u dei ban long hapoh 150 yard ka jingjngai na u Mawpud), hynrei, ki don katto katne ki bynta, lada ker ïa u sainar yn hap ban bud ryntih katkum kane ka kyndon, nangta kin don pat ki shnong ki ban shah pynhap shabar jong ka jingker. Halor kane, ngi la thoh sha ka MHA ban pdiang ïa kine ki jingpynsngew lane ha kito ki jaka kiba ngi hap ban pynthikna ba ka shnong ne ka jaka ba shong briew ka dei ban long hapoh jong ka jingkier. Ngi la thoh sha ka MHA bad ka MHA ruh ka la sngap ïa kane ka jingpynsngew bad kumba ka long mynta ki don katto katne ki jingeh ha kaba ngin dang hap ban ap ïa ka jingmynjur na ka MHA,” u la ong.
Da kaba pynpaw ba ka jinglong jingman mynta la lah ban tehlakam, u Bah Tynsong u la ong, “ha shilynter ka khappud hapdeng ka ri Bangladesh bad ka ri India, baroh ki Agency bapher bapher ki leh la ka jong ka kamram bad kaba donkam mynta ban leh ka long na ki tnat treikam jong ka Sorkar Jylla bad ka Sorkar Pdeng. Ki la trei la ka jong ka kamram ban pynthikna ïa ka jingshngaiñ jong ki briew jong ngi.”
“Ngi la bthah ruh ba ym dei satia ban wan ïalam beaiñ ïa ki mynder Bangladeshi sha India hynrei tang lada ki don ïa ki kot ki sla kiba biang. Kata ka dei ka hukum bad ngin pynthikna ba kan ym jia shuh nangne shakhmat,” u la bynrap.
