Shillong, K’lyngkot, 15: U Myntri Rangbah ka jylla u Conrad K Sangma ha ka sngi Balang u la ong ba ka Sorkar Jylla ka shim khia ban buddien ïa ka jingdawa ban pyntreikam ïa ka Inner Line Permit (ILP) khnang ba kan weng ïa ki jingeh kiba bun bad kan plie lad ban wanrah ïa ka lynti rel ha rilum Khasi bad Jaiñtia jong ka Jylla.
Haba jubab ïa ka jingkylli, u Sangma u la ong,, “haoid, ka dei kaba shishna, ngi la ïakren halor kane (lada ka Meghalaya ka ïoh ïa ka ILP, ka lah ban weng ïa ki jingeh kiba ïadei bad ka lynti Rel) bad dei na kata ka daw ba ngi la mynjur ïa ka rai (halor ka ILP) ruh. Dei tang ha kane ka sorkar kaba la mynjur ïa ka rai ha ka Iingdorbar Thawaiñ ka Jylla bad kane ka dei ka khubor kaba shai halor ka jingdawa ba ngi donkam ïa kane ka aiñ.
Hynrei u la pynpaw ba ka bor ban ai ïa ka ILP ka shong ha ka Sorkar Pdeng. “Kumta, na ka bynta jong ngi ban ong ba kan sa urlong ka long kaba eh, ngi lah ban ïai pynbor ïa ka Sorkar India, hynrei kam dei kaei kaei kaba nga lah ban shu kular noh mynta mynta.”
Da kaba pynpaw ba ka jingpyntreikam ïa ka ILP ka lah ban plie lad ban wanrah ïa ka lynti Rel, u Myntri Rangbah u la ong, “ka jingong jong phi ka long kaba shongnia bad ka dei kata ka mat kaba ngi la ïakren bad ka Sorkar India ruh ba lada shim ïa kane kawei ka sienjam kan plie lad na ka bynta kiba bun kiwei pat ki jait jingeh ban pynbeit.”
Da kaba ong kumta, u Sangma u la ïai ban ba ka Sorkar kan pynthikna ba ka jingpyntreikam ïa ka ILP kan ym ktah pat ïa ki kam jngohkai pyrthei ha ka jylla.
Shuh shuh u Sangma u la pyntip ba un sa ïakynduh ïa u Myntri ka Sorkar Pdeng uba khmih ïa ka tnat Rel ha New Delhi la shi sngi ban ïakren halor ka jingtyrwa ban wanrah ïa ka lynti Rel sha rilum Khasi.
Ka jingpyrshang ban wanrah ïa ka lynti Rel sha rilum Khasi ka la shah khanglad na ka jingpyrshah jong ki kynhun bapher bapher kynthup ruh ïa ki kynhun kiba pyrshah ïa ka jingwanrung kyrthep ki mynder shapoh ka jylla. Kiba bun, ki dawa ïa ka Sorkar ban pyntreikam shwa nyngkong eh ïa ka ILP shwa ban ïakren ïa ka projek lynti Rel.
“Ngi la ju ïai pynpaw ha ki lad pathai khubor bad ha baroh ki rynsan ba kano kano ka rai kaba ngi shim, kan long da ka jingshaniah jong ki paidbah ka jylla bad ki kynhun bapher bapher bad ngin pyrshang katba lah ban weng ïa kita ki jingeh bad nangta ngin sa ïaid shakhmat ban ïakren sa ïa ka lynti Rel,” u la ong.
U la pyntip ba ka Sorkar ka la ïaid shaid shaid ba ithuh ïa ki jaka ha rilum Jaiñtia bad ha rilum Garo na ka bynta ban wanrah bad ban bteng ïa ka lynti Rel.
“Ngin sa ïakren shwa bad ki kynhun bapher bapher bad nangta ngin sa ïaid shakhmat hynrei kane ka jingithuh ïa ki lynti kiba lah ban ai jingmyntoi ïa ka jylla bad ki paidbah bad ïa ka ïoh ka kot baroh kawei, ki jingithuh kiba lah ban long ïa ki lynti Rel ki lah ban urlong hynrei kata kan urlong tang ynda ngi la pynlong ka jingïakren bad ki kynhun bapher bapher,” la ïai ban u Sangma.
Haba kylli, u Sangma ula ong ba ka Sorkar India ka lah ban pynkynriah noh ïa ka projek lynti Rel sha rilum Jaiñtia ne sha rilum Garo.
