Shillong, K’lyngkot, 06: U nongaiktien jong ka BJP Meghalaya Pradesh u Bah M. Kharkrang u la ong ba kam don jingmut satia ban shu kem ïa ki nongbylla tih dewïong bad ïa ki nongniah trok kiba kit beaiñ ïa u dewïong namarba ki dei tang ki nongbylla barit baria hynrei lada ka Sorkar ka kut jingmut shisha ban pynduh pyndam ïa ka jingtih dewïong beaiñ ka dei ban pynmih da ka jingpynbna kaba tyngeh bad ban kem wat ïa ki nongaikam kiba donkti ban pynshlur ïa ka jingtih dewïong beaiñ.
Ha ka jingïakren bad u nonglum khubor ka Batesi Tv ha ka sngi Baar u Bah Kharkrang u la ong ba kito kiba donkti sha lyndet ki dei ki nongaikam ïa ki nongbylla ban pyntyllun shakmat ïa ka kam tih dewïong beaiñ bad ka Sorkar ka dei ban kem beit ïa ki khnang ban pynduhjait ïa ka jingtih dewïong beaiñ.
Kane ka jingkynthoh jong u Bah Kharkrang ka long hadien ba la saphriang ka khubor halor ka jingïap jong ki arngut ki nongbylla ba la kynnoh ba dei kiba nongdewïong beaiñ ha ka shnong Thangsko, East Jaiñtia Hills District bad la kam ba kane ka la jia ha ka 23 tarik, Nohprah, 2025 ha kaba uwei u nongbylla u la ïap hashen katba uwei pat u nongbylla uba la tip kyrteng kum u Ashok Tamang, 34 snem ka rta u la khladnoh ha Shillong Civil Hospital.
La kynnoh ba ki arngut ki la ïap bad bun ngut kiwei ki la mynsaw na ka jingpynbthei ïa u bom dynamite ha ka jaka tih dewïong beaiñ.
Ka Meghalaya Human Rights Commission (MHRC) kaba la shim sou moto halor ka jingmih ka khubor ha kawei na ki lad pathai khubor Phareng napoh ka jylla shaphang ka jingiap jong ki arngut ki nongbylla na ka jingpynbthei ia u bom Dynamite ha krem tih dewïong, ha East Jaiñtia Hills, ha ka sngi Baar ka la bthah ia u Superintendent of Police ka East Jaiñtia Hills ban pynlong ia ka jingtohkit kaba bniah halor kane ka jingjia.
Ha u kyrwoh ba la phah sha ki lad pathai khubor u Secretary ka Commision u L.Ch. Marak u la iathuh ba ka Commission ka la bthah ia u SP ban phah ia ka kaiphod kaba bniah katkum ka por ba la buh.
