Shillong, Jylliew, 06: U Myntri ka Sorkar Jylla Bah AL Hek ha ka sngi Thohdieng u la ai jingkyrshan ïa ka jingdawa ba dei ban aiti sha ka Central Bureau of Investigation (CBI) ba kan tohkit halor ka jingshah pynïap jong u nongjngohkai pyrthei na Indore, Madhya Pradesh u Raja Raghuvanshi, hadien ba ma u bad ka kurim jong u ki la jahrngai ha ka jingleit kai ‘honeymoon’ sha Sohra.
Ha ka jingïakren bad ki lad pathai khubor u Bah Hek u la ong, “ha,oid, ngi ruh ngi ong ba donkam ban phah tohkit ha ka CBI. Wat u Myntri Rangbah ka Jylla ruh u la phah ïa ka shithi (ban kyntu) ïa ka jingtohkit da ka CBI.”
U la ong ba ki bor synshar district, ki Pulit ka jylla ki la leh lut kat kaba ki lah ka bor ban dang ïai bteng ka jingwad ïa ka kurim jong uba ïap, ka Sonam, kaba dang jah rngai haduh mynta.
U Bah Hek, uba long ruh u nongïalam jong ka BJP u la pyntip tang hadien ba la ïoh jingtip na ka BJP ha Madhya Pradesh ba ki shikurim ki la jah rngai ha ka 23 tarik, Jymmang, u la shong bishar ïa ka jingwad bniah ha ka 24 Jymmang.
U Myntri u la ong ba baroh ka shnong ka thaw, kynthup ruh ïa ki Rangbah Shnong bad ki nongshong shnong jong ka thaiñ ki la mih shakhmat ban wad ïa ki shi kurim ba la jah rngai.
Haba takraiñ ïa ki lad pathai khubor na rithor kiba pathai khubor khlem da tih bniah ïa ki jingshisha halor kane ka jingjia bad pynjah burom, pynsniewdur ïa ka jylla Meghalaya, u Bah Hek u la ong, “kane ka dei kaba ngim lah ban pdiang.”
“Ki Pulit ki dang pynlong ïa ka jingtohkit ban ïoh ïa ki jingtip ba bniah halor kane ka jingjia. Ban ong ba baroh ki nong Meghalaya ki dei ki nongpynïap briew, ki nong Meghalaya kiba sniew ka long ka bym lah satia ban pdiang. Nalor kata, da ki hajar ngut ki nongjngohkai ki wan sha Meghalaya manla ka sngi bad kam ju don satia kano kano ka jingjia kaba sngewsih. Tang namar iwei i jingjia, phin shu kynnoh ba ki nong Meghalaya ki dei ki nongpynïap briew, ngi pynrem jur ïa kum kine ki jingkynnoh,” u la ong bad bynrap, “nga kwah ban phah ïa u kyrwoh sha ka Sorkar Pdeng bad sha Madhya Pradesh ba ki paidbah nongshong shnong jong ka Meghalaya kim dei kiba isih ïa ki nongjngohkai pyrthei ne ïa ki briew kiba wan nabar jylla.”
Da kaba pynpaw ba ki runar ki don ha manla ka jylla ha ka ri, u Bah Hek u la ong, “ki briew kiba don ïa ka jingmut sniew ki don kylleng ki jaka. Hato ngi lah ban ong ba ym don kum kita ha Indore, Madhya Pradesh? Hato ngi lah ban ong ba kam ju don kano kano ka kam bymman ha Madhya Pradesh, ha India? Ki kam runar ki jia kylleng kylleng, hynrei tang na iwei i jingjia bad phin shu kynnoh lut ïa ka jylla baroh kawei ka long kaba bakla shaba palat.”
“Phim lah ban shu teipop ïa ngi. Namarkata, ngi la kut jingmut ban wad bniah ïa kaei kaba ladep jia bad ngin pynthikna ba kito kiba donkti ha kane ka kam bymman kin shah pynsajia bad ngin pynthikna ba kum kine ki jingjia kin ym jia shuh ha kane ka jylla,” u la ong.
Haba kylli u la ong, “ka Meghalaya ka la tyrwa ban don ki tourist guide hynrei kum kine ki jingjia kin jia watla ki don ki nongïalam bad ki nongpahara. U briew uba don lypa ïa ka jingmut sniew un leh beit ïa kano kano ka kam ha la ka jong ka bor shimet ym ha ka kyrteng jong ka imlang sahlang. Nga kyntu ïa ki Pulit ban pynshitom ïa kum kine ki nongleh kam sniew bad ngim dei ban ailad ba kum kine ki kam runar kin jia biang ha ka jylla jong ngi ne ha kiwei pat ki ri.”
