Shillong, Jylliew 13: Ka kynhun Myntri ka Sorkar Jylla ha ka sngi Thohdieng ka la mynjur ïa ka jingtyrwa ban aiwai ïa ka jaka kaba heh 273.41 acre jong ka MeECL sha ka tnat Tourism na ka bynta ka 60 snem ban pyntreikam ïa kiba bun ki projek jong ka tnat ki kam Jngohkai ka jylla.
Haba kren sha ki lad pathai khubor hadien ka jingïalang jong ka kynhun Myntri, u Myntri ka tnat Tourism u Bah Paul Lyngdoh u la ong, “Nga dap da ka jingsngewkmen ban ïathuh sha phi ba na ka bynta ban pynmih pisa na ka jaka kaba khlem pat pyndonkam jong ka MeECL halor ki kam pynroi bad ban pyntreikam ïa ki projek ka tnat Jngohkai ka sorkar ka la ai ka jaka ban shim wai bad ban ïasam ruh ïa ka khajna kaba mih, ka kynhun myntri mynta ka sngi ka la mynjur ïa ka jingtyrwa ha kaba ka tnat Bording lyngba ka MeECL ka la rai ban ai ïa ka jaka kaba heh 273.41 acre ban wai ai wai ïa ki sha ka tnat tourism.”
Katkum ka jingong jong u, ki jaka ki kynthup ïa ka IB campus, ka jaka na Le-junction sha baroh shi lynter ka dyke, nangta na RI Shad Sngi shaduh ka shnong Nongsdier, ka police station bad baroh ka jaka kaba don sha lyndet ka skul MeECL, ka jaka sha lyndet ka NHRDC shaduh NESAC, ka thaiñ block V bad ka Lumpongdeng Island.
“Kane ka jingai wai ïa ka jaka jong ka tnat Bording sha ka tnat Jngohkai kan long katkum ki rukom treikam ka sorkar ka ban ai wai nyngkong haduh ki 60 tylli ki snem kaba lah ruh ban pynjlan da 30 snem,” u la bynrap.
Haba kylli, u Myntri u la ong, “Ka tnat kan siew shi tyngka ha ka shi acre hynrei ka bhah jong ka tnat Bording kan long 90% kum ka dor ba ai wai na ka bynta kine ki 60 snem kaba dei ha ka sien ba nyngkong kaba lah ban pynjlan sa 30 snem”.
U la ong ba kane ka jingtyrwa ka long ban pynïar bad pynheh ïa ka tnat tourism ha ka jylla.
Ka sorkar kan sa wanrah ruh ïa ki five star hotel, kan wanrah ïa ki jingai jingshakri lyngba ka Lake Cruise hapoh ka shisnem ban wan.
“Ngin sa dro ïa ka map ha kaba ngin sa pyndonkam ïa ka jaka kaba heh kaba dei kumba 273.41 acre,” bynrap shuh shuh u Bah Lyngdoh.
 | ReplyForwardAdd reaction |
