Shillong, Risaw, 01: U Myntri Rangbah ka Jylla u Conrad K Sangma u la ong ba ka Sorkar jong u ka la buh hakhmat eh ïa ka jingmihkhmat ki kynthei ha ka kynhun myntri ha ka kylla banynkong jong ka samoi treikam bad mynta u hap ban peit pat sa ïa ka jingangnud jong ki thaiñ ha ka kylla kaba ar.
Ha ka jingïakren bad ki lad pathai khubor ha ka sngi Baar, u Sangma u la pynshi ba ka jingthaw ïa ka kynhun myntri ka kynthup ruh ïa ka jingpynbiang tarajur lang, kynthup ïa ka jingmihkhmat na ki thaiñ bad ka jingpynkupbor ïa ki kynthe.
“Khlempep lada nga don 20 tylli ki shuki jong ki Myntri sorkar haoid (nga lah ban leh), nga laitluid bad nga lah ban pyndap ïa kita ki bynta baroh hynrei ki don ki jingduna. Ngi la hap ban pynïahap ïa ki jingangnud bapher bapher, kiba long kiba kongsan mar katjuh. Ka jingmihkhmat na ki kynthei ka long kaba kongsan na ka bynta jong ngi, bad dei na kata ka daw ha ka wat banyngkong ngi la pynthikna ba ngin ai,” u la ong.
Haba jubab ïa ki jingkylli halor ka jingïasam ïa ki jingkitkhlieh ha ka Kynhun Myntri, u Sangma u la kdew ba ka jinglong jingman ha ka saiñ pyrthei ha ka por ba la thaw ïa ka kynhun synrop ka long kaba pher. U la banjur ba ka kam Myntri Rangbah ka jylla ka dei kaba la jied da ki MLA jong ka kynhun synrop ne ka party kaba synshar bad ka jingshim rai ka kynthup ïa ki nongmihkhmat ba la jied da ki paidbah.
“Ka kyrdan jong u Myntri Rangbah ka dei kaei kaei kaba la jied da ki MLA na ka kynhun synrop jong ka party kaba ïoh bat ïa u lakam synshar bad kumta ngi la ïaid shakhmat bad ka jingjied ïa ki nongïalam jong ka Sorkar MDA ha kata ka por. Kumta, ka la long kaba ïa mynjur lang, ka dei ka rai ba la shim da ki nongmihkhmat ba la jied da ki paidbah bad kata ka dei ka rukom synshar paidbah.”
Ha kaba ïadei bad ki jingkynthoh ba dang shen jong ka Dr. Ampareen Lyngdoh, kawei na ki phra ngut ki Myntri ba la shah pynhiar shuki ha ka jingpynkylla thymmai ïa ka Kynhun Myntri, u Sangma u la pynshai ba ladep phah ïa ki shithi sha baroh ki Myntri kynthup ïa ki myntri ka NPP, ha ka 12 tarik u Naitung, ha kaba la batai bniah ïa ka jingpynkylla thymmai ïa ka Kynhun Myntri. U la pynthikna ba baroh ki Myntri ki la ïoh ïa ki shithi bad ki tip bha ruh ïa ka rukom treikam kaba dei ban bud.
“Kumta, ka jingong ba khlem ai jingtip ne khlem pyntip kam long kaba lah ban pdiang. Ha ki shithi la batai bniah. Ngam shym la ïasam ïa ki shithi sha ki nongthoh khubor bad lada donkam ngi lah ban ïasam ïa kata ka shithi ruh hynrei ïa kane la leh bad baroh ki la ïoh pdiang ïa ki shithi,” u la ong shuh shuh.
