Shillong, Jylliew, 21: Ka la long ka jingkmen kaba khraw haduh katta katta ïa ka 61Bn Meghalaya Girls Battalion NCC kaba la pdiang burom ïa ka samla Rifiness Warjri kaba la wan phai sha la iing hadien ba ka la lah ban jop ha ka jingliet kiew ïa u lum Everest ha ka 18 tarik, Jymmang 2025.
Ka samla Rifiness Warjri ka dei tang ma ka na Meghalaya kaba la shah jied ban leit kiew ïa une u lum uba jrong tam ha ka pyrthei uba ka jingjrong ka long 8848 hajar phut.
Kane ka samla kaba la don mynta 20 snem ka rta ka dei ka samla pule jong ka St. Anthony’s College bad ka dkhot jong ka 61Bn Meghalaya Girls Battalion NCC.
Ïa ka samla Rifiness Warjri la pdiang burom ha kad liengsuin Umroi da ki dkhot ka NCC, ki kmie ki kpa bad ki bahaïing hasem.
