Shillong, K’ Lyngkot 09: Ka Khasi Hills Autonomous District Council (KHADC) ka la rai ba shen kan ïasoi ïa ka soskular memorandum of understanding (MoU) bad ka Centre for Research in Schemes and Policies (CRISP) ban pynbeit ha kaba ïadei bad ki rukom thung kam thungkam da kaba wanrah ruh da ka recruitment policy kaba khuid ba suba hapoh ka council.
U CEM jong ka KHADC u Bah Pynïaid Sing Syiem ha ka sngi Palei u la ong ba ka rai ban ïasoi ïa ka MoU bad ka CRISP, kaba dei ka jaka pule ba la ithuh, ka la ïaid lang bad ka jingmynjur ba la wanrah da ka Comptroller and Auditor General of India (CAG) ha ka kaiphod jong ka, kaba la pynpaw halor ki jingbym ïaid beit ki rukom thungkam hapoh ka council.
“Ka kaiphod CAG kaba la wanrah hapoh ka dorbar tlang kaba dang shu dep kut jong ka Council ka la dep kdew shai ba ka rukom thungkam la leh khlem da ka jingpynmih ka jingpynbna bad ka jingpynlong ïa ki eksam ne interview,” u la ong.
U Bah Syiem u la ong ha ki por jong ki executive committee (ECs) barim ki la pyrshang ban wanrah ïa ka recruitment policy ha ka council hynrei haduh mynta ïa kane ym pat lah satia ban pyntreikam.
“Hynrei kane ka EC ba mynta ka la sdang ban shim ïa ki kam bad ka sorkar jylla bad mynta ngin sa ïasoi ïa ka MoU bad ka CRISP ban ïarap ïa ka KHADC ha ka ban thaw ïa kiba bun ki kyndon bad ki jingbthah khamtam kyrpang ban thaw ïa la ka jong ka recruitment policy,” u la ong da kaba pynthikna ba ka EC jong u kan wan ki lad ki lynti ban pynbha ïa ki jingtreikam jong ka district council ha ki snem ban wan.
Ka kaiphod ka CAG ka la bthah ïa ka KHADC ban pynduh noh ïa ka jingthung kam ïa ki 82 ngut ki nongtrei na ka daw ba la thung ïa ki khlem da ïaid kaktum ka recruitment policy.
“Ka jingbym ïaid katkum ka recruitment policy kan thaw ki lad ban thungkam da kaba shah liang ha kane ka bynta. Ban pynneh ïa ka jingdonkam ka jingïakhun ha ka eksam na ka bynta ban ïoh jied ïa ki briew kiba dei hok, ka Council ka lah ban bud ïa ki kyndon ka rukom thungkam. Kine ki jingthungkam nalor ba ki la pynkheiñ ïa la ki jong ki kyndon jong ka Council dei ban pyndam noh ïa ki,” ong ka kaiphod.
Ka KHADC Service Rules, 1961 ka thaw ki kyndon haba ïadei bad ka jingthungkam bad ka jingkyntiew kyrdan jong ki nongtrei jong ka KHADC.
Ka Rule 3 ka la kren shai ba ka jingthungkam ïa baroh ki kyrdan bad ki nongtrei dei ban long katkum ba la pynmih ha ki jingpynbna bad ba dei ban pynlong ïa ki eksam lane ha ka nongrim da ka ktien bad ka interview.
Ka jingkhmih ne bishar ïa ki jingbuh jingthoh ne record ka la pynpaw ba ka KHADC ka la thung haduh 82 ngut ki nongtrei ba pura (permanent) ha kiba bun tylli ki kam.
La ong ba ka jingthung ïa kine ki 82 ngut ha ki kam ba thylli la leh khlem da pymih ka jingpynbna. ïa ka jingthung ïa ki la leh tang da ka nongrim jong ka jingai jingmynjur na ka Executive Committee khlem da pynlong ïa kano kano ka competitive examination ne interview ne kiwei kiwei, ong ka kaiphod.
Ka KHADC ka la hap ban pynlut kumba T. 1.06 klur ha ka snem 2017-19 haba iadei bad ka jingsiew bad ki allowance na ka bynta kine ki nongtrei.
