Shillong, Jylliew, 13: Ka Iingbishar Meghalaya High Court ka la bthah ïa ka Sorkar Jylla bad ïa ka Committee ban pynlong ïa ki jingïalang bad ki kynhun Balang bapher bapher na ki kynhun Khristan na ka bynta ban ïapynbeit ïa ka jingeh ha kaba tep ïa kiba ïap ha ki lum jingtep.
Ha ka hukum ba ka la pynmih hadien ba la shong bishar ïa ka PIL ha ka sngi Palei, ka Division Bench kaba kynthup ïa u Chief Justice IP Mukerji bad u Justice W. Diengdoh ka la ong, “ngi ai por ïa ka Jylla bad ïa ka komiti tad haduh ka sngi ban shong bishar biang ïa kane ka Public Interest Litigation ban pynlong ïa ki jingïalang bad ki kynhun Balang bapher bapher jong ki niam Khristan ban pynbeit ïa ka jingeh ha kaba ïadei bad ka jingai jaka tep ïa kiba ïap ha ki lum jingtep.”
“Ngi pynkynriah ïa kane ka Public Interest Litigation tad haduh ka 3 tarik, Naitung, 2025 khang ba ka Jylla bad ka Committee kin dup lah ban ai lang ïa ka kaiphod ne la ka jong ka kaiphod shwa ka 1 tarik, Naitung, 2025, bad ban phah kopi ruh sha u Advocate -on -Record na ka bynta u nongmudui,” ka la bynrap.
Ka Bench ka la bthah ruh ïa ki lai tylli ki Autonomous District Council – ka Khasi Hills Autonomous District Council, Jaiñtia Hills Autonomous District Council bad ka Garo Hills Autonomous District Council ba kin ïatreilang bad ka Jylla bad ka Committee na ka bynta ban pyntreikam ïa kane ka hukum.
Dang shen, ka Bench ka la pan ïa ka kaiphod na ka jylla lada don kano kano ka jingtyrwa ban kham pynbun shuh shuh ïa ka jingdon ki jaka tep briew na ka bynta ki riewngeit jong ki Balang Khristan.
Ha kaba sdang, ka jingthmu jong ka Public Interest Litigation ka long beit thik tang na ka bynta ban pynsuk ban pynïoh jaka thang ïa ki briew kiba dei na ka jaitbynriew Khasi bad Jaiñtia bad ïa kiba la pdiang ïa ka jingngeit ha ka niam Hindu ha kawei pat ka liang, ha ka Jylla Meghalaya baroh kawei.
Ka mat kaba kongsan ka long ha kaba ïadei bad ka jingduna ki jaka thang metïap briew bad ka jingbym mon jong ki ar jaitbynriew ban ïasam ïa kawei ka jaka thang metïap briew.
Hynrei, ka Sorkar ka la pynkhreh ban shna ïa ki jaka thang metïap briew ha kiba bun ki bynta jong ka jylla.
Hadien kata, ka Bench ka la rai ban pynïar ïa ka jingthmu jong ka PIL ban kynthup ïa ki Khristan hadien ba ka la don ka jingbym ïasngewthuh jingmut hapdeng ki kynhun Balang bapher bapher ha ka niam Khristan ban ïasam lang ïa kawei ka jaka tep.
