Shillong, Naitung 18: Ka Sorkar Jylla ka la ïasoi ïa ka Memorandum of Understanding (MoU) bad ka Indian Institute of Management, Shillong ban ïatreilang ha kaba ïadei bad ka jingkylla ha ka imlang sahlang bad ha kane ka jingïasoi soskular la donlang ruh u Myntri Rangbah ka jylla u Conrad K Sangma bad u Chairman jong ka BOG, IIM Shillong u Shishir Kumar Bajoria, u Director ka IIM-Shillong u D.P Goyal bad u Secretary Planning ka sorkar jylla u Bah Cyril V.D Diengdoh.
U Conrad K Sangma, haba ai jingkren ula ong, “Ka long kaei kaei kaban ïai sah jingkynmaw ïa ka jingïasoi MOU kaba dei ka sngi kaba ka jylla kala kynmaw burom ïa u khlawait ka ri u Tirot Sing Syiem. Kane ka MOU kadei ka mat kaba ka sorkar ka phaikhmat bha bad mynta ka sngi kadei ka jingsdang jong ka jingïaid lynti ryngkat bad ka IIM, Shillong”.
Ula ong ba kane ka MOU kan pynleit jingmut ha kiba bun ki liang bad kawei na kita ka dei ka Chief Miniter’s E-Challenge Business Plan Competition kaba don palat 2000 ngut ki nongïashimbynta man la u snem ïa kaba la jied pat ïa ki 100 ngut bad la ai jingkyrshan ïa ki da ka song tyngka kaba T.10 Lak ryngkat bad ka jingai ram kaba T.50 Lak khlem ka jingshim ïa ka sut.
Ula ong ba ka jylla ka don ïa ka jingïohi jngai ban jam shaphrang sha ka jingnang jingstad bad ka ïoh ka kot.
U Mynti Rangbah ula banjur ïa ka jingdonkam ban ai jinghikai bad ban pynkup bor ïa ki nongtrei sorkar bad ïa ki dkhot jong ki District Council.
“Ka jingai jinghikai bad ka jingai jingbatai kaba bniah ïa ki dkhot jong ki District Council ka long kaba kongsan bha namar ba ki District Council kidei ki bynta kiba kongsan bha ha ka rukom pynwandur ïa ka rukom treikam bapher bapher ka jong ngi, ka rukom longtrai ia ka khyndew ka shyiap bad ki bynta kiba ïadei bad ka kolshor,” ula pynkut.
