Shillong, Nailur, 22: Ka Synjuk Ki Rangbah Kur Ka Bri u Hynñiewtrep kan pynlong ia ka Dorbar Bah III ha Dinam Hall, Jaiaw Pdeng ha ka 27tarik Nailur 2025 da kaba wer ia baroh ki khlieh rangbah kur jong ki kur baroh ha Rilum Khasi Jaintia ban iasnoh kti da ka ba wan sha kane ka Dorbar Bah ban iatai ia ki mat ki ba donkam ha ka ba pynneh pynsah ia ka riti kheiñ kur kheiñ na ka kmie.
U khlieh rangbah jong ka Synjuk, u Bah R L Kharpran u la maitphang ia ka jingthmu jong ka synjuk ha ka ba pynsngewthuh paidbah ia ka jingdonkam ban ri kyndong ia la ki riti dustur tynrai.
Na ka liang jong u saiñpyniar Bah Raphael Warjri u la kren mardor ia ka thymmei longkur longkha ha ka imlang sahlang Khasi bad u la kdew ruh ia ki nongrim ki ba shongkhia jong ka jingstad ki longshwa manshwa ban seng ia ka jait ka khong na ka kmie ka ba pun ba kha bynriew.
Kiwei kiwei ki para rangbah kur ki ba dei ki dkhot nongkitkam ki kynthup ia u Bah P. Syiem, symbud khliehrangbah, Bah Will Shylla, bad Bah J L Khongshei ki dkhot rangbah ha ka seng kmie kiba la pynsawa ia kajuh ka sur ban ha ka ba yn iakhun ban kyrda ia ki jingpyrshang ban kylla bad tynneng ia ka pyrthei bad ban leh bym suitñiew ia la ka tynrai.
Kumta baroh ki la ia tylli lang da kawei ka jingthmu ban kyntu ia baroh ki rangbah kur jong ki kur baroh ha Rilum Khasi Jaintia ba kin synrop lang ban wan sha ka Dorbar Bah III jong ka Synjuk Ki Rangbah Kur ban ia tai sani halor ka phang ‘Ka matti u Mynbarim ngin iai pynim, ia jaitbynriew ngin iai kyrsiew’.
