Shillong, Jylliew, 13: Ka Sorkar Jylla ka la mynjur ban pyntreikam ïa ka Chief Minister Regional Connectivity Scheme 2025 na ka bynta ban pynïasoh ïa ki District, ki Block bad ki Regional Headquarter da ka jingshakri jong ki Bos.
Haba pynpaw ba kane ka dei ka jingsdang banyngkong eh jong ka Sorkar, u Nongaiktien ka Sorkar MDA u Bah Paul Lyngdoh uba long ruh u Myntri ka Sorkar Jylla u la ong ba ka Kynhun Myntri ka la mynjur ban pyntreikam ïa kane ka skhim.
“Haduh 90 tylli ki Bos yn pynsdang shwa ïa mynta bad ka jingthmu kan long ban pynshlur ïa ki nongsengkam bad kawei na ki mat ba kongsan jong ka skhim ka long ban pynthikna ba kine ki bos kin poi ha ka jaka treikam jong ka district ha ka por 9.30 baje mynstep bad kin mih ha ka por 5.30 baje janmiet ban pynbiang ïa ki jingdawa na ki nongleit trei ophis, ki samla pule, ki nongpang kiba leit sha ki jaka sumar bad ki paidbah kiba leit sha iew sha hat,” u la ong.
U la pyntip ba ka jingkyrshan pisa kan long haduh 50% na ka jinglut baroh jong ki kali.
“Kan sa don ka jingnoh synniang na ka Sorkar kaba long 35% ka bai lut bai sep kum ka Down Payment ne kaba siew khyndiat khyndiat. Ki nongïoh jingmyntoi kin synniang 5% ban siew na ka bynta ka down payment bad ka jingkyrshan pisa ha ka ram ka ban long 60% ïa kaba yn siew biang hadien san snem sha ki nongïoh jingmyntoi,” la ong u Bah Paul.
Katkum ka jingong jong u, ka sorkar ka la ithuh ruh ïa ki lynti ki ban kynthup ïa ki jaka treikam bapher bapher jong ki block, ki jaka treikam jong ki district bad ki jaka treikam jong ki thaiñ.
U Myntri u la ong ba kane ka skhim kan pynshlur ban pyndonkam da ki Bos khnang ban weng ïa ka jingdheng kali ha surok.
Haba kylli, u Bah Paul u la ong, “namarba ngi ladep mad mynshwa kane ka sorkar kam don jingïadei satia hynrei lyngba ka jingmad ïa ka jingpynïaid ïa ki bos MTC ki la kylla ki nongkynti ka Sorkar bad mynta ngi la sngewthuh ïa kata bad kaba biang eh ka long ban pynshlur ïa ki nongseng kam riewshimet. Ki kham biang bad ki kham trei shitom bad ki kham lah ban buh jingkhein thik pa thik ïa ka jinglut bad ka jingïohnong.”
