Shillong, Jymmang, 02: Ka North Eastern Indira Gandhi Regional Institute of Health and Medical Sciences (NEIGRIHMS) ka dang ap ïa ka jingmynjur na ka Ministry of Health & Family Welfare na ka bynta ban pyntreikam ïa ka jingthungkam Nurse 80:20 ïa ki kynthei bad shynrang, ban kyntiew ïa ka rta thungkam bad kiwei kiwei de ki jingdawa.
Ïa kane la pyntip da u Director jong ka NEIGRIHMS u Dr N. Mehta ha ka sngi Thohdieng hadien ka jingïakhih ba khlem pud sngi ba la pynlong da ka Khasi Students Union (KSU) ban pyrshah ïa ka jingbym lah jong ka NEIGRIHMS ban pynurlong ïa ki mat jingdawa ha ka thungkam thungjam.
“Ka Institute ka ladep phah ïa ka jingtyrwa sha ka Ministry of Health and Family Welfare ka Sorkar India ryngkat ka jingai jingmut kaba khlaiñ na ka bynta ban pyntreikam ïa ka jingthungkam Nurse kaba 80 la 20 ïa ki kynthei bad shynrang ha ka jingthungkam Nurse, da kaba bud lang ïa kaba la leh kum ki hospital bapawnam ha ka ri kum ka AIIMS bad PGIMER. Ïa kane ka sienjam la shim hadien ka jingïasyllok kaba sani bha ha ka jingpynbiang ïa ki nongtrei kynthei bad shynrang ha ka koit ka khiah bad ban shah skhor ïa ki jingdawa ba la ïoh pdiang na ki kynhun bapher bapher,” ong u Dr. Mehta ha u kyrwoh ba la phah sha ki lad pathai khubor.
U la pyntip ba ka NEIGRIHMS ka ladep phah ruh ïa baroh ki shithi, ki dorkhas bad ki jingïakren ba la pynlong bad ki kynhun bapher bapher ka jyla, na ki MP bad na ka Myntri ka Sorkar Jylla kaba khmih ïa ka tnat ka Koit ka Khiah sha ka Ministry ba kan shong pyrkhat bad ban leh ïa kaba donkam.
“Ki dorkhas ki kynthup ïa ki jingdawa ba ïadei bad ka jingmang bhah kyrpang ïa ki trai jylla, ka jingkyntiew ïa ka rta thungkam, ban pynlong hi da ka NEIGRIHMS ïa ka eksamin thungkam bad ban pynlong ïa ka eksamin ha ka OMR format,” la bynrap u Dr. Mehta.
Shuh shuh u Director u la pynshai ruh ba katto katne ki rai ki hap hapoh u pud treikam jong ka Ministry of Health and Family Welfare bad kim dei kiba la pynkupbor ha u Director ne ha ka bor treikam jong ka Institute.
“Ka NEIGRIHMS ka bud ryntih katkum ki jingbthah, ki hukum, bad ki polisi ba la ïoh pdiang na ka Ministry. Ngi dang ap shuh shuh ïa ki jingbthah bad ka jingmynjur na ka Ministry halor ki mat ba la kdew haneng,” u la ong.
U Dr. Mehta shuh shuh u la pynshai ba ki Nursing Officers shynrang kiba rungkam ha NEIGRIHMS lyngba ka NORCET ba la pynlong dang shen ym shym la jied na ka daw ba ki duna palat ki marks lane kum ki kyrtong ba la shah kyntait.
“Ha kawei pat ka liang, bun na ki, ki dei kiba ïoh ïa ki marks kiba heh hynrei la thungkam ha NEIGRIHMS lyngba ka 80:20 female-to-male recruitment ratio kumba la pyntreikam ha AIIMS. Ki kynthei kiba duna marks ki la shah jied ha ka AIIMS, katba ki shynrang kiba kham heh marks la phah sha NEIGRIHMS hapoh ki kyndon jong ka sorkar pdeng.”
Da kaba pynpaw ba ka Institute ka bud ryntih ïa ka jingtreikam kaba khuid bad kaba shai, ka bud ruh ïa ki kyndon jong ka sorkar ha baroh ki jingthungkam, la ong u Director.
“Ngi kyntu ïa ki kynhun bapher bapher ban ap ïa ka jingpyntip ka ban sa wan na ka Ministry bad ban kiar katba lah na kino kino ki kam kiba lah ban pynthut ïa ka jingtreikam jong ka NEIGRIHMS,” la ong u Dr. Mehta.
Ka KSU haduh mynta ka dang ïai bteng ban pynlong ïa ka jingïakhih tad haduh ba ka NEIGRIHMS kan da pynurlong ïa ki jingdawa.
