Shillong, Nailar 08: U Chief Secretary ka jylla u Bah DP Wahlang ha ka sngi Thohdieng u la ong ba ka sorkar jylla ka la shim ïa ki sienjam ba kongsan ban ai ka jingshngaiñ ïa ki longkmie kiba shah thombor ha ka jylla.
Katkum ka jingïathuh u Bah Wahlang, u la ong ba ka sorkar ka la thaw ïa ka Directorate of Prosecution, ka ban khmih ïa kane ka kam ba shah thombor ki longkmie.
“Ngi la shim ïa ki sienjam ba kongsan da kaba thaw ïa ka Directorate of Prosecution kaba kyrpang ha une u snem ban shim khia halor ki kam ba shah thombor ki long kmie,” ong u Bah Wahlang haba kren sha ki lad pathai khubor ha kane ka sngi da kaba bynrap ruh ba la thung ïa ki public prosecutor ha kaba ïadei bad kane ka kam.
“Yn thung ïa ki Public prosecutor ha baroh ki district khnang ban pynkhlaiñ ïa ki lad jingïada ïa ki longkmie kiba ngat ha kane ka jingeh,” ong u Bah Wahlang.
U la ïathuh ruh ba ka sorkar ka kwah ban pynduna ïa ki kam shah thombor da kaba pynïakhlad ïa ka jingtohkit bad ki jingjia shah thombor.
U Chief Secretary u la batai ruh ba ka jingwanrah ïa ki fast track bad special court ka shong katkum ki aiñ bad ki statute. Katkum ki jingdonkam ka sorkar ka la pynbna ban buh ïa ki fast track court khnang ban pynsted ki kam bishar.
Haba kylli, u Bah Wahlang u la ong ba ki jingjia shah thombor ki longkmie ha ka jylla kam pat long kaba la kiew bad ong ruh ba wat ba kane ka jylla kadei kaba la burom ïa ki longkmie hynrei ym don sakhi pat ba kane ka kam shah thombor ka la nangkiew ha ka jylla.
Ha kaba ïadei bad ka jingwan jngoh Chairperson NCW, u Bah Wahlang u la ïathuh ba kane ka jingïalang ka la buh ïa ka thong ban ïakren ïa kiba bun ki jingeh kiba ktah ïa ki longkmie ha ka jylla, nangta ka jingpyndonkam bakla ïa u drok bad ki jingjia shah thombor ki longkmie ha ki ïing ki sem.
Na ka liang ka NCW chairperson ka la pynpaw ïa ka jingeh ha kaba ïadei bad ka jingkiew ki kam dih drok bad ki kam shah thombor ki longkmie ha Meghalaya.
Ha kaba ïadei bad kane na ka liang u Chief Secretary u la ong ba ka jylla ka la sdang ruh ïa ka One Stop Centre kaba la aiti na ka bynta ki longkmie kiba shah thombor ha la ki ïing ki sem, da kaba ai ki lad jingkyrshan bad ki lad jingsumar bad kumjuh ruh ka DREAM project ka thmu ban pynduh jait ïa ka jingjyllei jong u drok bad kaba ai ka jingkyrshan ïa kito kiba shah ktah.
U Bah Wahlang u la ïathuh ruh ba la pyntip sha ka NCW chairperson shaphang ki sienjam ba la shim da ka tnat pulit ha kaba ïadei bad ka jing jyllei u drok ha ka jylla bad ki jingshah thombor ki longkmie ha ki ïing ki sem.
Na ka liang ka chairperson watla ka pynpaw ïa ki jingsngewkhia hynrei ka la pynpaw ruh ïa ka jingsngewhun halor ki kam ba la leh da ka sorkar jylla bad pynbna ruh ba kan sa wan jngoh biang ïa ka jylla ha ki 6 bnai ban wan wan ban bishar ïa ki kam ka sorkar ban pynbeit ïa kine ki kam kiba ktah ïa ka jylla.
