Shillong, Nailar 17: Ka Khasi Students’ Union (KSU) South East Central Circle (SECC) bad ka Federation of Khasi, Jaiñtia and Garo People (FKJGP), Riwar Circle, hapoh ka jingïalam u samla Basuklang Khongwar (Vice President, KSU, SECC) bad u Evanfield Khonglam (President, FKJGP, Riwar Circle), ha ka sngi Saitjaiñ, ki la pynïeng ïa ki Redium Retro Reflective Tape ha shi lynter ka rud surok naduh na Laitlyngkot haduh ha Mawlieh kaba hab hapoh ka Package 2.
Kane ka jingmih shakhmat kine ki ar seng ka dei hadien ba ki ïohi ïa ka jingshim sting bad leh bym suitñiew ka company ïa ka jinglong shngaiñ bad ka jingsuk ka ïaid ka ïeng jong ki paidbah.
Kine ki arseng ki lah ïakren lah bunsien bad ki bor ba dei khmih na ka liang ka sorkar bad kumjuh ruh ïa ka company kaba pyntrei ïa ka surok Shillong- Dawki Road hynrei ha man ki sien ba ïakren ki shu kohnguh tang ka khlieh bad ki khlem pyni ka dak katkum ka jingïakren.
Kumta, kine ki ar seng kim banse shuh ban mih hi noh sha madan bad ban thung hi noh da la ki jong ki signal na ka bynta ka shngaiñ bad ka suk ki nongleit nongwan ha ka thaiñ Pynursla sub division.
Kine ki ar seng ha kajuh ka por ki maham tyngeh ïa ka company kaba trei bad ïa ka sorkar ba ki dei katba lah ban pynbit pynbiang ïa ka jinglong shngaiñ ka surok bad khamtam eh ba kin peit bniah ïa ka jingshngaiñ u paidbah la ka long ha ka bynta ka jingtwa khyndew ne ha ka bynta ka jinglong jingman ki rud bad ki kner surok. Lym kumta kine ki ar seng kin shim da kawei pat ka sien jam kaba kham tyngeh pyrshah ïa ka company ne ïa ka sorkar, ong ka kyrwoh na u Basuklang Khongwar, Vice President, KSU, SECC, Pynursla bad u, Evanfield Khonglam, President FKJGP, Riwar Circle, Pynursla.
