Shillong, Jymmang, 11: Ki nongniah City Bus kiba don hapoh ka shatri jong ka Shillong City Bus Syndicate (SCBC) ha ka sngi Saitjaiñ ki la pynpaw ia ka jingsngewkhia halor ka jingwanrah jong ka Sorkar Jylla da ka Vehicle Scrappage Policy khnang ban ym shah iaid ne shah kamai shuh ïa ki kali rim kiba kynjoh palat 35 snem shaneng khlem da ïasyllok shwa ïa ki trai kali.
Ha ka jingïakren bad ki lad pathai khubor u President jong ka SCBC Bah Hopefulwell Buhphang u la ong, “ngi sngewkhia khyndiat ba kumno ka Sorkar ka shu rai hakdak khlem ka jingpyntip ban shu kheiñ marjot.”
“Kane ka dei ka pliangja jong ngi kaba ngi im ja manla ka sngi ban pynbiang ïa ka ing ka sem bad ïa ki khun ki kti,” u la bynrap.
U la ong ba ki nongïalam jong ka seng kin sa leit ïakynduh ïa ki bor ba dei khmih jong ka tnat Transport ban pan jingpynshai la ka la pyntreikam neem ïa ka Vehicle Scappage Policy ha ka jylla.
“Ngin sa leit ban ïakynduh ïa ki bor ba dei khmih jong ka tnat Transports ban pynpaw ïa ka jingpyrshah. Ïa ka polisi ba ka sorkar ka la pynmih ngi pdiang na ka bynta ka jingbha ïa baroh. Kiba shong ha ka shuki ki pyrkhat ba kine ki City Bus ki lah rim, hynrei ka shu rim tang ka registration hynrei ban ong ki tiar ki tiar, ki enjin ki dei kiba thymmai suda,” u la ong shuh shuh.
Da kaba kynthoh ïa ki kali STPS ba ju tip paidbah kum ki kali saw, u President jong ka SCBC u la ong, “kaba kham isaitmet ka dei ïa ki kali saw (STPS) kaba ka Sorkar ka buh kiba la shu lyngkrang kat shaba ngi leit bad shaba ngi ïaid.”
“Hynrei kam ju don ka jingthud la ka long ha ka dheng kali ne ka jingduh ki City Bus ha lynti. Kam ju don kano kano ka jingjia aksiden haba ki leit sha ki bam khana bapher bapher ne kino kino ki jingleit kai sngewbha ba (ki kali City Bus) kin duh bad kin hap sahmiet. Namarba ka ai ja, ngi sngewthuh bha bad ngi pynbiang ïa ka kali bad ym don kawei ruh ka kali kaba jot,” ula bynrap.
“Lada ka Sorkar ka ong ba ka kali jong ngi ka la rim, ngi kyrpad ba kan phah ïa ki Expert ban phah peit ïa ki kali bad ïa ki enjin la ki lah dei shisha neem kiba rim kumba ma ki ki pyrkhat,” u la ong shuh shuh.
Haba kylli, u la ong ba ki nongïalam jong ka seng kin sa leit tohkit shwa na ka tnat Transports la ka lah pyntreikam neem ïa ka polisi.
U la ong ba lada ka shah ka kam, ka seng kan sa leit wad jingtip wat na ka ophis DTO, na u Commissioner and Secretary ka tnat Tranports bad wat na u Myntri ka Sorkar Jylla uba khmih ïa ka tnat Transports.
“Ngi pdiang ïa ka polisi jong ka sorkar hynrei lada ka sorkar kan shu phah kheiñ marjot khlem kano kano ka jingsiew bailutksan ïa kaba ngi la pynlut, ngin pyrshah,” ong u President ka SCBC.
U la ïathuh ba ki City Bus kiba kamai ha nongbah Shillong ki don kumba 43 tylli.
Katkum ka jingïathuh jong u Bah Buhphang, ki City Bus kiba la shakri ïa ki paidbah nongleit nongwan ha Sor Shillong ki dei kiba la don naduh u snem 1954.
“Ki City Bus ki la shakri bha haduh katta katta la ka long ïa ki nongrep, ïa ki khynnah skul, ïa ki khynnah pule kolej. Lada phi pynduh noh ïa ki City Bus ka mut ba phi pynduh noh ïa ka dur jong u Khasi ba ngi lah ban shna ïa kine Bos da ki mekhanik Khasi jong ngi,” pyntip u Bah Buhphang.
U la ong shuh shuh ba tang ka bai shna ïa ka shynrong jong ka bos ka kot ym duna ïa ka T.15 lak. “Lada ka Sorkar ka pynbiang (ïa ka bailutksan) ngin hap ban ïatreilang bad ka Sorkar bad ngin ym lah ban kyntait ïa kata. Lada ka Sorkar ka kloi ban ai bujli da kiwei pat ki kali ba thymmai ngi pdiang ïa kata. Hynrei ban shu pynduh beit ïa kine ki kali khlem kano kano ka jingsiew, ngin ym randien ngin hap ban ïaid shakhmat.”
U la pynpaw ruh ïa ka jingsngew sarong ïa ki City Bus ba ki dei shisha ki kali kiba paka tam ha ka leit ka wan bad ka rah ka rong.
