Shillong, Nailur 09: U Symbud Myntri Rangbah ka jylla uba khmih ïa ka tnat Home (Police) u Bah Prestone Tynsong ha ka sngi baar ula ong ba ka sorkar ka pdiang ïa ka jingtalasi ki sengbhalang ïa ki kot ki sla ki nongbylla bar jylla, hynrei kano kano ka kam pat kaba long sha lyndet jong kata, kum ki jingbyrngem ne ki jingktah kti ka aiñ kam lah ban shah.
“Haoid ngi la ïohi ïa kiba bun ki jingtalasi da kiba bun ki sengbhalang bad ngi la ïohi ruh ba ki la leit sha ki jaka ban khmih ïa ki kot ki sla bad imat ki la ong ïa ki ruh ba kin leit phai noh ban wanrah ïa ki kot ki sla, nga tharai ba kane ka long kaba biang. Hynrei lada ki sengbhalang ki ïaid pat ïa u pud da kaba byrngem ne pynshitom ïa ki, ngam tharai ba aiñ kan shah,” ong u Bah Tynsong sha ki lad pathai khubor.
U Bah Tynsong u la ïathuh ruh ba ka sorkar ka pdiang sngewbha ïa ka jingwan bylla ki briew kiba nabar hynrei ki dei pat ban don ïa ki kot ki sla kiba donkam kiba long katkum ka aiñ.
