Shillong, Nailur, 07: Kan long shisha ka jingkyrkhu bakhraw ïa ka jylla Meghalaya khnang ba kiwei ki jaidbynriew nabar jong ka jylla kin kham tip bniah shaphang ka jylla hadien ba kawei ka samla Khasi kaba la pyndep ïa ka Graduate ha ka sobjek Hindi ka la buh thong ba sa thoh da ka kot ïa ka khana pateng shaphang ka jylla Meghalaya.
Kane ka samla pule ka dei kaba la tip kyrteng kum ka samla Ibanpyntngen Kshiar kaba la ïoh bat ïa ka kyrdan banyngkong ha ka result ba dang shu pynbna dang shen da ka skulbah North Eastern Hill University (NEHU) mynta u snem.
Ka samla Ibanpyntngen ka dei ka samla pule jong ka Shillong College na ka Batch 2021-2024.
Ha ka jingïakren bad u nongthoh khubor ka samla Ibanpyntngen, ka la ïathuh ba naduh ka por ba ka dang rit u kpa jong ka, u dei uba ju ai mynsiem bha ïa ka ban pule ïa ka ktien Hindi. Ka la ïathuh ba ha ki por ba dang leit skul, ban pule ïa ka ktien Hindi kam long satia kaba suk bad ban thoh ruh ïa ka ktien Hindi ruh ka shitom haduh katta katta.
“I pa im ju ong wat ju pule ïa ka Hindi ne ïa kano kano ka sobjek hynrei i kheiñ beit ba kano kano ka ktien kaba ngi pule ngim dei ban thew ïa ka niam. Dei i pa iba ju hikai ïa nga ïa ka ktien Hindi, suki nga la sdang ban sngewtynnat bad ban pule ïa ka ktien Hindi, ban sngap ïa ka jingrwai Hindi bad ban ïakren da ka ktien Hindi bad ki paralok nabar jylla,” ong ka samla Ibanpyntngen.
Ka la ïathuh ruh ba ka la shong skul ha Kendriya Vidyalaya bad ka sobjek Hindi ka long Compulsory bad hap ban nang ruh ïa ka ktien Hindi.
Ka la ïathuh ruh haba ka shem jingeh ban sngewthuh ïa ki senten ha ka ktien Hindi ka ju pyndonkam ïa ka Google Translate.
“Lada phi don ka jingangnud naduh ka dohnud ban nang ïa kano kano ka ktien, phin lah beit ban leh ïa kata. Ngi ïohi ruh ba bun na ki jylla kiba don shabar ka thaiñ Shatei Lammihngi ki kren beit ïa ka ktien Hindi bad bun ki briew na rithor kim da tip bha shaphang ki jylla ka thaiñ Shatei Lammihngi bad lada nga nang ïa ka ktien Hindi nga lah ban thoh ïa ka khana shaphang ka jylla Meghalaya ha ka ktien Hindi khnang ba ki briew kiba nabar kin dup tip shaphang ka jylla,” la ong kane ka samla.
Haba kylli, ka la ïathuh ba kan nang bteng ïa ka jingpule Master Degree ha skulbah NEHU bad ban bteng ruh ïa ka jingpule haduh ban pyndep ïa ka Ph.D.
