Shillong, Lber, 28: Ka tnat Excise jong ka Sorkar Jylla ka la thmu ban pyntreikam pura noh ïa u QR Code na ka bynta ka kiad hapoh 60 sngi.
“Ngi dang pyrkhat la kumno kumno ngin pyntreikam noh ha u bnai Jylliew. Hapoh 60 sngi, ngin pyntreikam,” ong ka Commissioner ka tnat Excise ka Kong Matsiewdor War Nongbri haba kren sha ki lad pathai khubor hadien ba la wai ka jingïalang ha ka sngi Thohdieng ba la pynïaid da u Myntri ka Sorkar Jylla uba khmih ïa ka tnat Excise u Bah Kyrmen Shylla.
Ka la pyntip ruh ban sa ai jinghikai ïa ki ophisar jong ki district kumno ban pyndonkam ïa ka Track and Trace System naduh ka por ba la shna ïa ka kiad tad haduh ka khep ba la die sha ki nongthied.
“Manla ki ophis, kawei pa kawei ka jaka shna kiad (bottling plant), manla kawei pa kawei ka jaka saiñ kiad bad ki jaka die kiad (bonded warehouse) bad kiwei kiwei haduh ki dukan die kiad kin hap ban don ïa kane ka Track and Trace System. Na kata ka daw, yn hap ban Scan ïa u QR code bad dei da kane ka rukom ngin dup lah ban tip shaei ki mar ki poi bad hato ki la poi neem sha ki jaka ba la thmu bad hato ladep die neem ai ki,” la ong ka Kong Nongbri bad bynrap, “kane kan ïarap haduh katta katta ïa ka tnat bad nga kyrmen ba ngin sa lah ban tip mardor, bad ngin sa lah ban ïohi ïa ka jingwan ka khajna tang shi syn khñiot ïa u budam”’
Haba kylli, ka Commissioner of Excise ka la ong, “namarba ngi la don ïa ka System kaba la ai jingmynjur bad ka kynhun (M/s CMP Enforce System LLP na Delhi) kaba la ïoh ïa ka Tender kan sa shimkhia ïa ka kam bad kin sa buh ruh ïa ki briew jong ki ha ki district bapher bapher. Kane kan ym shim por. Ngi la don ruh ïa ki ophisar haduh ki langrut bad kiwei kiwei ha ki Bonded Warehouses bapher bapher (ban khmih ïa ka jingpyntreikam ïa u QR Code).”
Dang shen, u Myntri Rangbah ka jylla u Conrad K Sangma haba pynbna ïa ka rai jong ka Kynhun Myntri ban mynjur ïa ka jingtyrwa ban pyntreikam ïa u QR Code ha ka tnat Excise u la pyntip ba ka jingthmu ka long ban pynbeit ryndih ïa ka kam nadong shadong khnang ba ka khajna kan ym lait ei.
Katkum ka jingong jong u, la khmihlynti ba ka jingïoh lum khajna jong ka tnat Excise kan kiew na ka 5% sha ka 10 %.
