Shillong, Lber, 26: Ka Sorkar Jylla ka la rai ban pynbiang pahuh ka bording sha baroh ki Civil Hospital kiba don hapoh ka jylla.
Ïa kane la pyntip da u Myntri ka Sorkar Jylla uba khmih ïa ka tnat Bording u Abu Taher Mondal hadien ba la wai ka jingïalang Kynhun Myntri kaba la long ha ka sngi Balang.
U Mondal u la ong ba lyngba ka pilot basis ka Meghalaya Energy Corporation Limited (MeECL) ka la shimti ïa ka Shillong bad Tura Civil Hospital ban pynthikna ïa ka jingpynbiang bor ding khlem jingthut lada jia ba don kano kano ka jingpynlip bording bym poi pyrkhat.
“Kumta katkum kane, ngi la kyrpad ïa ka Sorkar ba kan ai ïa ngi ïa ka jaka ha ka jaka treikam jong ka ophis Sericulture ha Tura, ïa kaba ngin pyndonkam na ka bynta ban buh ïa ka 33/11 KV bad 25MVA Sub-station kiba kyrpang na ka bynta ka Tura Civil Hospital”, u la ong.
“Bad ban pynheh ïa kiwei pat ki jaka ruh, ngi la pan ïa ka jaka Sorkar kaba don pyrshah ïa ka ktem sah ki shipai BSF ha Danagre bad kawei pat ha ka jaka jong ka MTC ha Dakopgre bad ka Sorkar ka la mynjur ban ai ïa kine ki lai tylli ki jaka,” la pyntip u Mondal bad bynrap, “da kine ki lai tylli ki Sub-station kin ïarap ïa ka jingpynmih bording kaba pahuh bad ka bym don jingthud satia,” u la bynrap.
Shuh shuh u Myntri u la pyntip ba ka Kynhun Myntri ka la mynjur ïa ka jingtyrwa ban kyntiew kyrdan ïa ka NEHU bad ka Mawlai Sub-station khnang ban pynkiew ïa ka jingdawa bording.
“Ngi don mynta sa kawei pat ka Sub-station ba thymmai ha Mawkhanu ban sam ïa ka bording sha ka nongbah Shillong,” u la bynrap shuh shuh.
