Shillong, Jymmang, 06: Ka khun kynthei jong u Bah Kyrshanborlang Shangpliang, ka samla Cynthia Lalhlupuii Shangpliang kaba pule ha ka St. Paul’s Higher Secondary School, Aizawl ka poi ha ka kyrdan kaba nyngkong eh ha ka result Higher Secondary School Leaving Certificate (HSSLC) Science Stream ba la pynbna da ka Mizoram Board of School Education (MBSE) ha ka sngi Baar.
Ka Cynthia ha kane ka kynti ka la ïoh 477 marks na ka 500 kaba dei ka Full Marks. Ka kyrteng jong ka Cynthia ka la paw bha ha ka jylla Mizoram namarba ka la ïoh bat ïa ka kyrdan kaba nyngkong ha ka eksmin matrik kaba la long ha u snem 2023 da kaba ïoh 485 mark.
Ha ka Arts stream ka samla Lalrammawii Tochhawng kaba pule ha Mount Carmel School, Aizawl ka la wan ha ka kyrdan banyngkong da kaba ïoh 471 mark na ka 500 ka Full Mark. Katba ka Kristin Laldinpuii Ralte kaba pule ha Oikos Higher Secondary School, Aizawl ka rung ha ka kyrdan banyngkong da kaba ïoh 470 mark.
Ka Cynthia ha ka jingïakren bad u nongthoh khubor lyngba ka mobile phone ka la ïathuh, naduh ka por ba ka dang pynkhreh ïa ka eksamin matrik tad haduh mynta ba kan da ïoh bat ruh ïa ka kyrdan kaba nyngkong ha ka Class-XII ka ju pynlut por kumba hynriew haduh phra kynta ha ka shisngi ban minot ïa ka jingpule kot.
Ka la ïathuh ba mynta ka don jingthmu ban bteng ïa ka jingpule ha ka Medical Science.
Ha ka jingïakren bad u Kpa, Bah Kyrshanbor Shangpliang uba sah ha Lumkshaid Mawprem, Shillong hynrei uba la shong la sah noh mynta ha nongbah Aizawl, Mizoram u la pynpaw ïa ka jingsngewkmen ba ka khun kynthei jong u kan poi ha ka kyrdan kaba nyngkong.
U la ïathuh ba mynshuwa u hynmen jong ka Cynthia ruh u ïoh bat ïa ka kyrdan kaba hakhmat eh ha ka Class-X bad kumjuh ruh ha ka Class-XII bad mynta ki la bteng ïa ki jingpule jong ki ha ka kyrdan ba kham hajrong.
Kaba kham sngewtynnad ka long, watla ka kmie jong ki khun jong u Bah Shangpliang ka dei ka Mizo hynrei ki khun jong u pat ki ju ïakren beit bad u kpa da ka ktien Khasi katba ïa ka kmie ki ïakren da ka ktien Mizo.
 | ReplyForwardAdd reaction |
