Shillong, Jymmang, 29: Phra ngut ki suba mynder Bangladeshi ki la shah bat ha ki dkhot jong ka Jaiñtia Students Union (JSU) ha ka shnong Demthring, West Jaiñtia Hills District ha ka step sngi Palei.
Ki mynder ba la shah bat ki kynthup ïa saw ngut ki shynrang bad saw ngut ki kynthei katba ki dang shong ha ki ar tylli ki kali Wagon R ba don ïa u nombar ML05 AE 4857 bad ML05 AB 3544.
Baroh phra ngut kim shym la lah satia ban pyni ïa ki kot ki sla bad mar mar ki dkhot ka JSU ki la aiti noh ïa ki sha ki Pulit ka Jowai Police Station ban leh ïa kaba donkam, la pyntip ka JSU ha u kyrwoh.
Kine ki phra ngut ki la phla ba ka don kawei ka kali Alto kaba la lait phet tang shu ïohi ba ki ar tylli ki kali ki la shah bat.
Ka JSU ka la aiti ruh da ka jingujor halor kane da kaba kyntu ïa ki Pulit ban leh da kaba tyngeh katkum ki kyndon jong ka aiñ pyrshah ïa ki mynder poiwir.
