Shillong, Risaw 09: U Chief Executive Member ka KHADC u Bah Winston Tony Lyngdoh ha ka sngi Palei u la bate kam sha ki Executive Member jong ka Executive Committee ba la ïalam da ka VPP da kaba bat ruh halade ïa ka tnat general administration, appointment, posting & transfer, trade, enforcement, revenue collection, arts & culture, Khasi traditional medicine commission (KTMC) bad kiwei.
Kane ka la wan tang shisngi hadien ba u Lat ka jylla u la mynjur ïa ka thup jong ki 7 ngut ki executive member kaba kynthup ïa 2 ngut ki longkmie.
Ïa u Bah Powell Sohkhlet la pynkhamti ba un khmih ïa ka land, development bad information & technology katba u Bah Seiborlang Warbah un khmih ïa ka finance, taxation bad forest.
Ïa ka Kong Aibandaplin F Lyngdoh la aiti ba kan khmih ïa ka tnat health & sanitation, solid waste management bad education, katba ïa ka Kong Deity H Majaw kan khmih ïa ka law & legal kaba kynthup ïa ka jingpyntreikam ka Khasi Social Custom of Lineage Act and Rules, constitutions of courts, marriage & divorce bad ki town committee.
Haba ïadei bad kiwei ki Executive Member, la pynkhamti ïa u Bah Isynei Hinge ban khmih ïa ka tnat water resources bad fisheries, u Bah Pynkhrawboklin Kharjahrin un khmih ïa ka council building bad council asset bad ka building byelaw bad u Bah Denzil Raynard Chen un khmih ïa ka tnat Elaka administration bad market.
“Kiwei kiwei ki tnat ba khlem sam ne bhah sha ki EM, kiba ïadei bad ki kam thungkam thungjam, ka jingpynkynriah kam bad ka jingthungkam ïa ki Officer bad ki nongtrei ha baroh ki tnat, kin hab hapoh ka jingpeit bad khmih hi jong u Chief Executive Member,” ong u Bah Lyngdoh ha ka jingpynbna.
“Shuh shuh, ki kam kiba kongsan haba ïadei bad ki jingïasyllok bad u Chief Executive Member lane hakhmat ka Executive Committee ïa baroh ki kam kiba kongsan kin hap hapoh ka jingshim jingkitkhlieh jong ka Executive Committee kaba long ruh katkum ka Rule 31(1),” u la bynrap.
Ka EC ba la ïalam da u Bah Lyngdoh la thaw hadien ka jinghiar shuki ba dangshen jong u CEM barim u Bah Shemborlang Rynjah na ka daw jong ka jingbym don ha ka met kaba koit ba khiah.
