Shillong, Nailur 17 : U Myntri Rangbah ka Jylla Conrad K Sangma ha ka sngi Balang u la bate kam ïa ki phra ngut ki Myntri ba dang shu dep bam smai ha ka Lah Sngi u Blei.
Katkum ka jingbatei kam, ki arngut ki Symbud Myntri Rangbah ka Jylla, kata, u Bah Prestone Tynsong bad u Bah Sniawbhalang Dhar ki dang ïoh ban bat ïa kijuh ki tnad treikam khlem pynkylla.
U Marcuise N Marak uba khlem shah pynhiar shuki u la shah pynkhamti sa ka tnad Soil & Water Conservation nalor ka tnad Public Health Engineering (PHE) bad ka tnat Housing.
U Bah Metbah Lyngdoh u la ïoh ïa ka tnad Bording, tnat Water Resource, tnat Taxation bad ka tnat Textiles. U Bah Lahkmen Rymbui u la ïoh bat biang ïa ka tnad Pule Puthi ha ka sien kaba ar, nalor ka tnat Revenue and Disaster Management, ka tnad Information and Public Relations bad ka tnat Law.
U Timothy D Shira u la ioh khmih ïa ka tnat Tourism, tnat Agriculture bad ka tnat Fisheries.
U Brening A Sangma u la shah bynshet ban peit ïa ka tnat Border Area Development, ka tnat Excise bad ka tnat Home (Civil Defence and Home Guards).
U Bah Sosthenes Sohtun u la ioh bat ïa ka tnad Community & Rural Development (C&RD), ka tnat Secretariat Administration Department (SAD) bad ka tnad General Administration Department (GAD).
U Bah Wailadmiki Shylla u la ïoh ban bat ïa ka tnad Health & Family Welfare, ka tnat Sports & Youth Affairs bad ka tnat Home (Passport).
U Bah Sanbor Shullai u la ioh bat ïa ka tnad Animal Husbandry & Veterinary, ka tnat Arts & Culture, ka tnat Printing and Stationery bad ka tnat Legal Metrology.
Katba u Bah Methodius Dkhar u la shah bynshet ban peit ïa ka tnad Food Civil Supplies & Consumer Affiars, ka tnat Labour Employment & Skill, ka tnat Registration & Stamps bad ka tnat Cooperation.
Kum ban shu pynkynmaw, ki MLA ba la shah jied kum ki Myntri ba thymmai ki long saw ngut na ka National People’s Party (NPP) ba kynthup ïa u MLA ka Jowai Bah Wailadmiki Shylla, Timothy D Shira (Resubelpara), Brening A Sangma (Dalu) bad Bah Sosthenes Sohtun na Jirang Constituency.
Ki arngut ki MLA na ka United Democratic Party ki kynthup ïa u Bah Metbah Lyngdoh na Mairang constituency bad Bah Lahkmen Rymbui na Amlarem.
Katba na ka BJP pat dei u Bah Sanbor Shullai MLA ka Shillong South bad na ka HSPDP pat dei u MLA ka Mawshynrut Bah Methodius Dkhar.
