Shillong, Jylliew, 30: Ki sengbhalang na rilum Jaiñtia bad na rilum Khasi kiba don hapoh ka shatri jong ka Confederation of Meghalaya Social Organisation (CoMSO) ha ka lah sngi U Blei ki la hiar jurip ïa ka Rattacherra Police Checkpost, ka khyrdop talasi mynder, kaba don ha Ratacherra, East Jaiñtia Hills bad ha ka Anti-infiltration Check Gates kaba don ha Killing, Ribhoi District ban bat, ban tohkit naphang, ryngkat ka jingdonlang jong ki Pulit, ia ki briew kiba nabar kiba wan rung shapoh ka jylla Meghalaya.
Ha East Garo Hills District ia ka jingtalasi mynder la pynlong da ka CoMSO lyngba ki dkhot jong ka Garoland State Movement Committee (GSMC).
Ha Ratacherra bad ha Killing ki dkhot ka CoMSO ki la ïoh bat ïa ki briew kiba wan nabar kiba thmu ban rung sha kane ka jylla Meghalaya khlem ki kot ki sla kiba biang.
Ha ka jingjurip ba la lamkhmat da u Vice Chairman jong ka COMSO Jaiñtia Hills Region u Bah Sambormi Lyngdoh ryngkat bad kiwei pat ki seng kiba don hapoh ka COMSO, kynthup ïa ka HYC, Jaiñtia Students Movement (JSM) bad ka Jaiñtia National Council (JNC) la lap ba ki don ki riewshimet kiba la shah bat bad ba la pynphai biang sha ka jaka ba ki wan namar ka jingbym don ki kot ki sla kiba biang.
“Kane ka mat ka dei ka jingeh kaba khraw ïa ki nongshong shnong ka Jylla Meghalaya, namarba ki briew kiba nabar ki bym lah ban pynshisha ki lah ban wanrah ïa ki jingeh bapher bapher hapoh ka jylla bad ban knieh noh ïa ki hok jong ngi,” ong u Bah Sambormi Lyngdoh.
Dang ha ka 21 tarik mynta u bnai ka COMSO kaba la shong ïa ka jingïalang ha nongbah Shillong ka la mynjur ïa ka rai ban bishar bniah ïa baroh ki jaka talasi ïa ki briew kiba wan rung tuh ha kylleng ka jylla.
Mynta ka sngi, ka COMSO ka la pynpaw biang ba kane ka dei tang ka jingsdang, da kaba pynleit jingmut ha kaba jurip ïa ki jingtreikam jong kine ki jaka talasi hynrei ïa ki sienjam ba hakhmat eh ban tehlakam ïa ka jingwan rung jong ki briew kiba nabar sha ka jylla yn sa pyntreikam noh ha ki sngi ki ban wan bad yn sa leh ïa ki sienjam kiba tyngeh lada donkam, la ong shuh shuh u Vice Chairman ka COMSO Jaiñtia Hills.
