Shillong, Naitung 13: Ka Khasi Students Union (KSU) South East Central Circle, ha ka sngi Saitjaiñ ka la leit ban khynra Work Permit ïa ki bar jylla kiba trei bylla sha ki thaiñ Pynursla bad ha kane ka sngi ka KSU ka la pynher krad ia ki katto katne ngut ki nongbylla bar jylla kiba dang trei ban shna ïing ïa ka ophis Block Development Officer (BDO) ka Pynursla C&RD Block namar ki wan trei khlem ka Work Permit kaba donkam ïa kino kino ki bar jylla kiba trei bylla ban ïoh ïa kane ka dulir sorkar.
U President jong ka KSU South East Central Circle u samla Wallamjingshngaiñ Suting u la ong ba kane ka sienjam kaba ka seng ka shim ban kynra ïa ki bar jylla kiba wan trei sha ka thaiñ ka long ban pynthikna ba ki dei ban biang ki kot ki sla.
U la ong ruh ba ha kine ki sngi lah ban ïohi ba ka Sorkar lyngba ka tnat Pulit ka la kem bad pynngat kyndon pyrshah ïa ki dkhot ka seng kiba khynra Work Permit hynrei u ong ba kum ka seng kim tieng kim smiej ïa kane ka jingpyrshang pyntieng koh tympan jong ka Sorkar
Haba bynrap, u Vice President jong ka Circle u samla Basuklang N. Khongwar u la ther tyngeh ïa ka Sorkar Jylla bad ïa u Myntri Rangbah ka jylla uba la ong ba kam donkam ïa ki briew kiba nabar ban don ia ka Work Permit haba ki wan ban trei sha ka jylla bad u la ong ruh ba kane ka jingkren jong u Myntri Rangbah ka pawshai kdar ba um tip satia ïa ka aiñ kaba ka Sorkar jong u hi ka shna ban pynmih ïa ka Rule.
