Shillong, Jylliew, 05: Ka Hynñiewtrep Youths’ Council -Central Executive Council (HYC-CEC), ha ka sngi Balang ka la pynlait paidbah ia ka jingrwai ‘Bei Rymaw’, kaba khot ia u khun bynriew ban iada ia ka mei mariang.
Ka jingrwai ka long ha ka sur kum ka jingkyrsiew thiah ia ka imlang sahlang ba kan shim la ka bynta ban sumar ia ka mariang.
Ia kane ka jingrwai la thoh da ka nongthoh jingrwai bapaw ka Bri Hynñiewtrep, ka Kong Amabel Susngi, da kaba iarwai lang bad ka samla Kong Bahun Marweiñ. Ka jingrwai bad ka music video ka pyni bad ka kren ruh ia ka jingitynnad ki ranab lum bad ki them ka ri Khasi, kiba ym ju iohi koit ha kiwei pat ki jaka ka pyrthei.
U President ka HYC, Bah Roy Kupar Synrem u la ong, “haba ngi peit ia ka sawdong sawkun jong ngi, ngi sakhi ba ia ki wahduid la pynjaboh, ia ki khlaw la tan bad ia ka mei mariang la pyntngit. Kum ka seng ngi dap da ka jingsngewkhia kaba khraw ban kren ia kane ka mat bad ngim lah ban peit, hynrei ngi sngew ba ka don ka jingkhot ia ngi ban iawer ia baroh ban leh eiei ban iada ia ka mei mariang. Kane ka jingrwai, namar kata, ka khot ia ki paradoh parasnam ban pynkut noh ia ka jingleh thurmur ia ka mariang”
“Ka jingleh beiñ leh khoh ia ka mariang ka dei kaba lah ban wanrah ia bun ki jingmynsaw, kumba ngi lah iohi ha ka jingjulor ba la wanrah da ka erlangthari ‘Remal’ dang shen. Ka jinghap noh jong ka khyndew bad wat ka jingduhnoh ia ki mynsiem briew ha ka jylla jong ngi bad ruh ha kiwei pat ki jaka, ki dei kiei kiei kiba ngi dei ban sngewthuh. Lada ngi ailad ia ki jingpynjulor, kata hi shisien ka sngi kan kyrtoh kylla bad kan wanrah ia ka jingsyier ia ka jingim,” u la ong.
Ka jingpynlait paidbah ia kane ka jingrwai ryngkat ka jingiatreilang bad ki kaitor bad ki nongthaw jingrwai, ka dei kum shi bynta ban rakhe iaka jingdap 10 snem jong ka HYC ka ban long ha ka 17 tarik, Naitung, kaba dei ruh ka sngi ba la seng ia ka.
Ka jingkyrmen ka long ba ki briew kin sngap iaki kyntien jong ka jingrwai ba la thoh bad rwai ha ka ktien Pnar bad ktien Khasi Sohra.
Ka Kong Amabel Susngi kum ka nongthoh ia ka jingrwai ka la ong, “ka khubor kaba don ha kane ka jingrwai ka long beit ban iawer ia baroh ban pyrkhat khia ia kane ka kam ban iada ia ka mariang. Ka jingpyndonkam ia ki jingtem tynrai kum ka Duitara, ka Ksing shynrang, ka Padiah bad ka Bom, ka thew ruh shaphang ka rukom im ka jaitbynriew Hynñiewtrep kaba iajan bha bad burom bha ia ka mariang. Ka jingpyrshang jong ka HYC, namarkata, ka long kaba dei por bha.”
Ia kane ka jingrwai la pynbit pynbiang da ka kynhun Summersalt. Ka kynhun Summersalt ka la thoh shibun tylli ki jingrwai kiba kren ia ki mat kiba ktah mationg ia ka imlang sahlang da kaba khot bad wer ia ka jaitbynriew ban im adkar ryngkat ka jingkit khlieh.
Ka jingrwai “Bei Rymaw’, ka dei namar kata ka jingiatrei lang hapdeng jong ka kynhun bad kiwei kiwei ki nongrwai ban kren ia ka jingshisha bad pynsngew ia ka jingdonkam ban iada ia ka jingai kaba U Blei U la ai ia ka ri Khasi bad Jaiñtia.
