Shillong, Jylliew, 20: Ka Sorkar Jylla ka dang pynkhreh ban pyndep ïa ka jingpynkut noh shisyndon ïa ka CMJ University.
U Commissioner & Secretary uba khmih ïa ka tnat Pule Puthi u Vijay Kumar Mantri ha ka sngi Thohdieng u la pyntip ba ki jingkam ki dang don ïa kiba ka tnat ka dang pyrshang ban pynbeit kham kloi katba lah.
Ki don ki jingkam jong ki samla pule kiba lah ban leh ïa katto katne ki jingpule, hynrei kim shym ïoh ïa ki syrnot, ka jingkam jong ki nonghikai kiba la ïohkam hynrei kim ïoh bainong, ka jingkam jong ki nongtrei ba kim shym la ïoh bainong, ka jingkam jong ki nongai jingshakri, ka jingkam jong ki nongdie jingdie bad kiwei kiwei.
Katkum ka jingong jong u, ki don palat 500 tylli ki jingkam ba la ïoh pdiang ha kaba ïadei bad kane.
“Ki ong ba ki la lah ban pynbeit ai ki jingeh hynrei ym baroh namarkata ngi la bthah ba kin pyrshang ban pyndep kham kloi katba lah bad dei tad ynda la lah ban pynbeit ïa kine ki jingeh hangta ngin sa lah ban ong ba ladep ban ïapynbeit,” la ong u Mantri.
“Hadien kata, ngin hap ban pynkylla ruh ïa ka Aiñ bad kata kan dei ka lynti kaba khatduh eh,” u la bynrap.
Ka thymmei khubor ka pyntip ba ïa u Administrator la thung da ka Sorkar Jylla ha ka 20 tarik Rymphang, ban peit ha kaba ïadei bad ka jingkhang khyrdep bad ka jingpynkut noh shisyndon ïa kane ka skulbah shimet ha kaba u ladep ban phah ruh ïa ka kaiphod halor kane ka kam.
U Mantri u la ong ba ka CMJ University kam lah shuh ban pdiang ïa ki samla pule haba jubab ïa ka jingkylli halor ka jingkynnoh ba ka skulbah ka la shim rai ban dang ïai bteng ban pdiang ïa ki samla pule bad pynbna ruh ïa ki course kiba thymmai da kaba ïalam bakla ïa ka hukum jong ka Supreme Court kaba pynsangeh ïa ka rai jong ka sorkar jylla ban pynkut noh ïa ka skulbah.
Ha ka 14 tarik, Rymphang, lai ngut ki heh ophisar da ka jingbthah jong ka Sorkar ki la leit jngoh ïa ka Campus jong ka CMJ University kaba don ha Jorabat ban pynthikna ïa ka jingshngaiñ jong ka Campus.
Kane ka kynhun ka la hukum ïa ka University ban khang lut ïa baroh ki jingpyllait pisa, ka jingtreikam bad ka jingbteng ban ai jinghikai bad ban pynthikna ba ym dei ban pynkynriah eiei ruh ïa ki jingdon jingem na ka Campus, kynthup ïa ki File, ki computer, ki hard disk ne ban pynkhih wat ïa kiwei kiwei ruh ki tiar.
Ïa kane la leh hadien ba la bud ïa ka hukum ba la pynmih da ka Supreme Court ha ka 13 tarik Rymphang kaba hukum ban khang khyrdep noh ïa ka CMJ University ha Meghalaya, da kaba pynskhem ïa ka rai jong ka sorkar jylla ban khang khyrdep ïa kane ka jaka pule ha u snem 2014 namarba la kynnoh ba ka la shukor ïa ki hajar ngut ki samla pule da kaba ai ïa ki syrnod Degree thok.
Ka Supreme Court ka la pynskhem ïa ka hukum jong ka jylla, da kaba kyntait noh ïa ka jingbthah jong ka ïingbishar Meghalaya High Court ha u snem 2021 ban bishar biang ïa ka jingpyndam ïa kane ka skulbah.
