Shillong, K’lyngkot, 23: Ki paidbah jong ka shnong Umñiuh Tmar bad kiwei ki shnong na ka thaiñ ri War Pynursla ki la khie lep hadien ba ka Meghalaya Energy Corporation Limited (MeECL) ka la phah siew ïa ka bai thang bording jong ki snem baladep, kata, u snem 2015-2016.
Katkum ka jingïathuh jong ki riew rangbah, ka ophis u SDO ka MeECL Pynursla, ka la phah da ka shithi sha ki trai iing ha ka shnong Umñiuh Tmar bad ïa kiwei kiwei ki shnong ba ki dei ban siew ïa ka bai thang bording jong u snem 2015-16 bad ki don kiba ka MeECL ka phah siew haduh T. 10 hajar bad T. 25 hajar.
Kiba la ïoh pdiang ïa ka shithi na ka MeECL ki la kyndit katlah katïai namarba ki la pynpaw ba ki ladep ban siew tista manla u bnai ïa ka bai thang bording khlem pynsah satia.
U Sirdar ka Umñiuh Tmar Bah Nanglamlad Khongshah u la ïathuh ba u la lum da ka jingïalang jong ki nongshong shnong ha kaba ki la rai ba un leit mih sha ka ophis treikam jong ka MeECL ha Pynursla ban ïakren bad lada jia ba ka kam, kam ïaid kumba ki la thmu, kin sa shim da kiwei ki lynti.
“Ki nongshong shnong ka Umñiuh-Tmar Elaka ki la khie bitar lep hadien ba ki la ïoh shithi ban phah siew ïa ka bai thang bongding. Ka jingïalang hynnin ka sngi Balang, ka la rai ban phah mihkhmat da u Sirdar sha ka ophis MeECL Pynursla halor kane bad lada kam sngap ïa ka jingïakren, ki paidbah kin sa shim da kiwei pat ki sienjam”, la ïathuh u Sirdar.
La ïoh jingtip ba kum kane ka jingjia, ka la jia ruh ha kiwei ki shnong jong ka thaiñ ha kaba ki longiing ki baduk ki la kyndit kumba iuh tdong bsein haba wan poi ka shithi na ka MeECL ba kin hap siew ïa ka bai thang bording kaba la kot da ki hajar bad phew hajar wat haba ki ladep siew tista naduh ki snem baladep.
U Sirdar ka Umñiuh-Tmar u la ïathuh ba wat ki skul ruh ki ïoh kum kane kajuh ka shithi na ka MeECL kat haduh ba ka la pynshaiong hi ngaiñ ïa ki.
