Shillong, Jylliew 10: Halor ki jingmih ki jingshisha baroh ba ïadei bad ka jingshah pynïap dang shen jong uwei u nongjngohkai pyrthei na Indore ha Sohra, ki la mih kiba bun balang ban pynrem jur halor ka jingshah pynthoh bria jong ka jylla Meghalaya ha kiba bun ki rukom.
Kane ka jingpynrem bad ka jingdawa ka la mih ha ka sngi baar da ka jingïakhih ba jai jai kaba la long ha Khyndailad Shillong bad ha kane ka jingïakhih da kaba rah ruh ïa ki placard ba pynrem kine ki longkmie ki la pynpaw ruh ka jingbitar lep halor kine ki jingshah pynthohbria ba har rukom.
Ha kane ka jingïakhih ba jai jai ka long ban pynrem jur ïa ka jingthmu ban pynbud nam sniew ïa ka Meghalaya bad ki briew kiba ieid ïa ka shong suk shong shngaiñ da ka jingpynsaphriang ïa ki khubor ki bym dei bad kiba bakla halor ka jingshah pynïap u Raja Raghuvanshi ha ki thaiñ Sohra ha kine ki sngi ba la dep.
Kane ka jingïakhih kaba jai jai ha ka sngi baar la khot pynlong da ka longkmie kaba don jingsngewkhia ka Kong Mary Victoria Marweiñ, kaba shong basah ha Lawsohtun, Block-4 Shillong bad la synranlang ruh da ka Kong Biolin Pyrtuh kawei na ki nongïalam ka seng kiba die madan ha Khyndailad bad ha kane ka sngi la ïohi ïa ka jingïashim bynta jong ki briew na ki bynta bapher bapher kynthup ïa ki nongïalam na ki sengbhalang.
Haba kren sha ki lad pathai khubor ka Kong Marweiñ ka la ong, “Ngi don hangne ban pyrshah ïa ka jingpyrshang ban pynjah burom ïa ka jylla bad ki paidbah jong ngi. Kum ki longkmie, ngi sngewkhia ba ki jingïathuhkhana kiba sniew kin ktah ïa ki khun bad kiba ieid jong ngi, kiba trei bad pule shabar Meghalaya.”
“Kum ki longkmie ngi kyntu ïa ka Sorkar Jylla bad ka tnat pulit ba kin leh da kaba tyngeh ïa ka ïing ka sem jong kitei ki arngut bad ïa kiba donkti ban pynbud nam sniew ïa ka dur ka dar jong ka jylla. Ngi dawa ba ki dei ban pan map paidbah na ki paidbah ka jylla Meghalaya bad khamtam eh na ki nongshong shnong jong ka thaiñ Sohra baroh kawei,” ong ka Kong Marweiñ.
Ka la ong, “Ka mut aïu ban kynnoh ïa ki khynnah Khasi ba ki rah ïa ka Sonam sha Bangladesh ban leit die sha katei ka ri. Kumno u tip ba ki Khasi jong ngi ki la leit rah kynthei ban leit die sha Bangladesh. U Kpa jong ka Sonam u dei ban pynshai ïa kine ki jingkynnoh. Katkum ka jingtohkit ki pulit la lap ba dei ka kam pynïap bad lada ka kurim jong u kam donkti balei ka phet na Sohra, ha kato ka por kadei ban don hi ha Sohra keiñ ba kan pan ka jingïarap na ki shnong ki thaw bad na ki pulit hynrei manla ka sngi ki bahaïing u Raja ki kynnoh ïa ka Meghalaya ba ki dei ki briew kiba sniew bad ki kynnoh ruh ba ki leit die ne khaïi briew sha Bangladesh, ki la kynnoh ruh ba ka Sonam kaba dangim hana la leit die sha Bangladesh, hynrei kumno pat na Bangladesh ka la leit poi sha Maharashtra, bad haduh mynta ba ka la wan pyndem ruh ki dang ïai kynthoh ïa ka jylla jong ngi.”
Ha kaba ïadei bad ka jingshah byrngem ki Khasi kiba sah shabar jylla ka Kong Mary ka la ong, “Lada ki Khasi jong ngi ki pynïap shisha ïa u Raja ki dei ban pynshisha bad lada ki nud ban ktah ïa ki Khasi jong ngi, ma nga ruh kum ka longkmie ngan kob beit. Mynta lada u wan kai shane bad u kiew sha lum sha wah bad u hab ne ïap phi mut ban shim kput ïa ki briew jong ngi?. Hato ki Khasi ki dei kiei ba ngin shu sngap. Mynta lada u ne ka Khasi ki ïap sha Indore hato don hok mo ban kynnoh ïa ka shnong ne dei ban kynnoh ïa uta uba pynïap? Balei la shu kynnoh kat ïa badon.”
Ka Kong Marweiñ ka la kyntu ruh ïa ka tnat Pulit lyngba u SP u Bah Vivek Syiem ba kadei ban tohkit haduh 15 sngi ïa ka Sonam halor kane ka jingjia.
Na ka liang ka Kong Pyrtuh pat ka la ong ba bun na ki nongwan jngohkai kiba wan sha kane ka jylla ki dei kiba sngewtynnad bha bad ka jingwan jong ki ruh ka ai kamai bha ïa kiba die madan ha Khyndailad, hynrei mynta pat ka ïew ka hat ka la kham hiar na ka daw ba mih kane ka jingjia.
“Ngi kwah ba u Kpa jong ka Sonam bad u Hynmen jong ka ba kidei ban wan sha jylla Meghalaya ban panmab halor kine baroh ki jingkynnoh,” ong ka Kong Pyrtuh.
Ha kane ka sngi la don ruh ka seng HYC Sengkmie haph ka jingïalam jong u President u Bah Roy Kupar Synrem, kiwei pat ki bar jylla, nangta ki dkhot ka Police Bazar Welfare Association bad kiwei ki riew paidbah.
