Shillong, Lber, 17: Kawei ka samla kaba la 18 snem ka rta ïa kaba la tip kyrteng kum ka Andalucia Sangriang na ka shnong Nongkynjoin West Khasi Hills District ka la jah na la ïing naduh ka thohdieng ka 13 tarik, Lber, 2026 bad mynta la 5 sngi kam shym pat la wanphai satia sha la ïing bad ym tip ruh shano ka don mynta.
Ka Andalucia ka dei ka khun nyngkong jong u Bah Nightstar Snaitang bad ka Kong Skildaris Sangriang bad ka dei ruh ka samla kaba dang ap ruh ïa ka result Class XII na Sib Sing Memorial Governments Higher Secondary School Nongstoiñ.
U Bah H.S. Sangriang uba dei u kñi jong ka Andalucia u la kyrpad ba lada don mano mano ba ïohi ba kin sngewbha ban pyntip lem ha u mobile number 6009774552 bad u 9366756187.
Ka kmie jong kane ka samla ka la ïam pait dohnud katba ka dang ïakren bad u nongthoh khubor bad ka la kyrpad ïa la ka khun ba kan wanphai noh sha la ïing khlem da ïathew bad ban ïa map noh lada ka kum kren bakla ne kum pyndiaw eiei ïa la ka khun da kaba ong ba ka ieid thep mynsiem palat ïa ka khun jong ka.
Ha kaba ïadei bad kanem ki bahaïing ki la pyntip ruh sha ki Pulit ka Nongstoiñ police station bad ki pulit ruh dang trei ïa la ka kam ban buddien ïa kane ka jingjia.
