Shillong, Risaw, 24: Hapdeng ka jingïakren halor ka jingdawa ban khang noh ïa ki kali Tourist kiba wan nabar khamtam na ka jylla Assam kiba ju rung shaduh ki jaka jaka jngohkai pyrthei bapher bapher kiba don hapoh ka Jylla Meghalaya, u MDC jong ka Sohra Constituency u Bah Titosstarwell Chyne uba long ruh u Nongïalam jong ka Liang Pyrshah ha Iing Dorbar Thawaiñ jong ka Khasi Hills Autonomous District Council u la ong ba la donkam ban bsuh da ki kyndon jong ka Trading by Non-Tribals khnang ban tehlakam ïa ka jingrung laitlan ki kali tourist kiba wan nabar ka jylla.
Ha ka jingïakren bad ki lad pathai khubor ha ka sngi Palei u Bah Titos ula ai jingmut ïa ka Executive Committee jong ka Khasi Hills Autonomous District Council (KHADC) ban ïamir jingmut bad ka Sorkar Jylla halor kane ka bynta.
U la ong ruh ba kito kiba buh ïa ki nongñiah kali da ki nongbylla bar jylla bad kiba pynïaid ïa ki kali kamai tourist hapoh u pud u sam jong ka Khasi Hills Autonomous District Council ki dei ban da don ïa ka Trading License.
Dang shen ka All Khasi Meghalaya Tourist Taxi Association (AKMTTA) ka kynhun jong ki nongñiah kali kamai Tourist Taxi ka la dawa ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ban thaw da ka polisi kumba long ha ka jylla Sikkim ban khanglad ïa ki kali Tourist kiba nabar ka jylla ban kit ïa ki nongjngohkai sha ki jaka jngohkai pyrthei kiba don ha ka jylla.
Ïa kane ka jingdawa jong ka AKMTTA la pyrshah da ki kynhun bapher bapher kiba ju pynïaid ïa ki kam jngohkai pyrthei naduh ki nongbuh iing basa, ki nongaiwai kali Tourist.
Ka Sorkar ka la thaw da ka komiti ba la khlieh da u Director ka tnat Jngohkai Pyrthei ban ïakren halor kane ka jingdawa jong kane ka kynhun kaba ïaid shakhmat haduh mynta.
