Shillong, Naitung 12: Shi taiew hadien ba ka seng KSU ka la buh ïa ka ILP check gate lane ka khyrdop khynra mynder ha Ri Bhoi District ha Mawleiñ, ha ka sngi Thohdieng ka KSU West Khasi Hills ka la buh sa kawei pat ka ILP check gate ha ka shnong Athiabari bad talasi naphang ïa ki mynder kiba wan na Assam lyngba ka West Khasi Hills.
Ha kane ka jingbuh Check Gate jong ka KSU, la iohi ruh ba ki Pulit ki la pyrshang ban khang ïa ka jingleh jong ka KSU hynrei na ka liang ki dkhot ka seng ki la ieng beit ha kane ka jaka bad ban talasi ïa ki kali bad ïa ki briew ba wan na shabar ka jylla.
Ka KSU ha ka taiew ba ladep, ka la pynjur ïa ka jingkhynra ïa ki mynder khamtam eh ïa ki nongbylla bar jylla, namar ba ka sorkar ka suki palat ban pyntreikam ïa ka ILP bad kumjuh ruh kam shym la pyntreikam satia haduh mynta ïa ka aiñ MRSSA.
Baroh shitaiew ki dkhot jong ki shnat treikam ka KSU ki la pynlong ruh ïa ka jingkhynra ha kylleng kylleng ki jaka jong ka nongbah Shillong.
Halor kane ka jingleh jong ka seng, u Myntri Rangbah ka jylla u Conrad K. Sangma u la ong ba kino kino ki kynhun kim don hok satia ban khynra namarba ka dei ka bor jong ka aiñ bad Labour Department.
U Myntri Rangbah ka jylla u la ong ba ki nongbylla bar jylla kiba wan sha ka Meghalaya, kim donkam satia ïa ka Work Permit hynrei ka KSU ka la pynkynmaw ba ki don ki aiñ ba ki nongbylla ki dei ban rejistar ne ki dei ban ïoh ïa ki kot ki sla kiba biang, la ka long na ki Autonomous District Council lane na ka Labour Department.
